ԱՄՆ քաղաքացի Մեթյու Միլլերը, ում այս տարվա ապրիլին Հյուսիսային Կորեայում կալանավորել էին՝ զբոսաշրջիկի կարգավիճակը խախտելու համար, 6 տարվա ազատազրկման է դատապարտվել, որն անցկացնելու է ուղղիչ-աշխատանքային գաղութում: Այս մասին տեղեկացնում է France Press-ը՝ վկայակոչելով Կորեայի կենտրոնական հեռագրական գործակալությանը:
Գործակալության տվյալներով, Միլլերին մեղադրել են Փհենյանի դեմ «թշնամական» գործողությունների համար: «Նա ապրիլին զբոսաշրջիկի անվան տակ երկիր մտնելով՝ թշնամական գործողություններ է իրականացրել Կորեայի Ժողովրդա-դեմոկրատական հանրապետության դեմ»,- գրել է կորեական լրատվամիջոցը:
Ըստ «ՌԻԱ Նովոստի»-ի, ապրիլին հայտնի էր դարձել 24-ամյա Թոդ Մեթյու Միլլերի ձերբակալության մասին՝ «միգրացիոն գործընթաց անցնելիս ցուցաբերած կտրուկ պահվածքի համար»: Նրան ձերբակալել էին ապրիլի 10-ին, անձնագրային հսկողության անցակետում: Այստեղ նա պատռել էր իր տուրիստական վիզան եւ հայտարարել, որ հույս ունի ապաստան ստանալ Հյուսիսային Կորեայում:
Մայիսի կեսերին երկրի իշխանությունները տեղեկացրեցին նաեւ ամերիկացի Ջեֆրի Էդվարդ Ֆաուլի ձերբակալության մասին: Այս դեպքում ձերբակալության պատճառների մասին ոչինչ չի նշվում:
