Վիետնամի ոստիկանությունը որոնում է 400 հիվանդների, որոնք փախուստի են դիմել Հայֆոն քաղաքում գտնվող թմրամոլների վերականգնողական կենտրոնից, հաղորդում է BBC-ն:
Տեղի իշխանությունների տվյալներով՝ հիվանդները, սպառնալով կենտրոնի անվտանգության աշխատակիցներին, բացել են դարպասները եւ լքել վերականգնողական կենտրոնը:
Հաղորդվում է նաեւ, որ փախուստի դիմածները վնասել են հարակից տները: Իշխանությունները հրահանգել են փակել այդ շրջանում գտնվողն խանութներն ու այլ հաստատությունները:
Փախուստի դիմածներից 30-ն ինքնակամ վերադարձել են վերականգնողական կենտրոն:
Նշենք, որ Վիետնամում թմրամոլներին պարտադրում են վերականգնողական կենտրոններում երկամյա բուժման կուրս անցնել, սակայն հաճախ այդպիսի կենտրոններում պայմանները բազմաթիվ բողոքների ու քննադատության հիմք են դառնում: