Հայաստանի ոստիկանապետ Վլադիմիր Գասպարյանն իր վերջին հարցազրույցից հետո պետք է պաշտոնանկ արվի, որովհետեւ նա գերազանցել է իր պարտականությունները։ Այս մասին այսօր՝ սեպտեմբերի 16-ին, ասաց ՀԱԿ մամուլի խոսնակ Արման Մուսինյանը։
«Հարցազրույցը կարող ենք որակել՝ որպես անարգանք գործող օրենքներին, նորմերին։ Ինչ վերաբերվում է «թեժ աշուններին սառը ցնցուղ» հայտարարությանը, ապա եթե փորձել են դրանով վախեցնել ժողովրդին՝ փողոց դուրս գալու համար, ապա շտապեմ նրանց հիասթափեցնել։ Ժողովուրդը գիտի, տեսել է, որ իրենք իրենց ձայնը բարձրաձայնել են՝ չխախտելով Սահմանադրությունը»,- ասաց նա։
Արման Մուսինյանի խոսքով՝ գործող ոստիկանապետը մի քանի խոստովանություններ է արել.«Նախ նրա ղեկավարած ռազմական ոստիկանությունը մասնակցել է կառավարության պաշտպանությանը, իսկ դա անթույլատրելի է։ Երկրորդ՝ սպառնալիքներ հնչեցնելով՝ Վլադիմիր Գասպարյանը հայտարարել է, որ քաղաքական կողմնորոշում ունի, մինչդեռ նա պետք է կատարի հասարակական կարգի պահպանումը։ Հետեւաբար, Վլադիմիր Գասպարյանը գերազանցել է իր պարտականությունները։ Նրա հրաժարականի հարցը պետք է բարձրացնել»։
Նշենք, որ սեպտեմբերի 12-ին լրագրողների հետ զրույցում Վլադիմիր Գասպարյանը, խոսելով քառյակի խոստացած թեժ աշնան մասին, հայտարարել էր, որ նման աշունների համար կան սառը ցնցուղներ։ Բացի դրանից անդրադառնալով Մարտի մեկի բացահայտման մասին Աղվան Հովսեփյանի հայտարարությանը՝ ոստիկանապետը հայտնել էր, որ ինքը գործի քննության ընթացքին ծանոթ չէ, իսկ մարտի մեկին էլ ինքը պաշտպանել է կառավարության շենքը։