Երեւանի Քանաքեռ-Զեյթուն համայնքի Զաքարիա Սարկավագի փողոցում ճանապարհաշինարարական աշխատանքներն իրականացվում են անվտանգության կանոնների խախտումներով։
Այսօր առավոտից դիտահորների քանդման աշխատանքներ էին կատարվում ճանապարհի վտանգավոր հատվածում՝ ոլորանի վրա։ Տարածքն անվտանգության ժապավեններով առանձնացված չէր, շինտեխնիկայի առկայության մասին հուշող որեւէ նշան չկար։
«Առանց այն էլ այս հատվածում շատ են լինում ավտովթարներ այն պատճառով, որ շրջադարձ է, բայց ոչ մի նշան չկա, որ շրջադարձ է: Հիմա էլ ոչ մի նշան չկա, որ այստեղ շինարարական աշխատանքներ են կատարվում: Մեքենան կարող է արագությամբ գալ ու առանց նկատելու հենց աշխատողների վրա քշել»,-NEWS.am-ին բողոքեց տեղի բնակիչներից Հովիկ Հարությունյանը:
Քանդման աշատանքներ կատարող բանվորները NEWS.am-ի հետ զրույցում ասացին, որ պարզապես փորձում են զգույշ լինել եւ հնարավորին հեռու մնալ իրենց կողքով անցնող ավտոմեքենաներից:
Նշենք, որ բնակիչների կողմից ստացված ահազանգի հետքերով NEWS.am-ի նկարահանող խմբի այցելության պահին ճանապարհի շինարարության մասին նախազգուշացնող նշան չկար, սակայն նկարահանող խմբին տեսնելով՝ աշխատողներն այն արագ տեղադրեցին։
Քաղաքապետարանի հասարակայնության հետ կապերի վարչության պետ Արթուր Գևորգյանը NEWS.am-ի հարցանն ի պատասխան ասաց, որ մայրաքաղաքում ճանապարհաշինարարական աշխատանքները վերահսկում է քաղաքապետարանի համապատասխան վարչությունը, որը խախտումներ նկատելու կամ դրանց մասին ահազանգ ստանալու դեպքում դադարեցնում է աշխատանքները, մինչեւ դրանք շտկվում են։