Թուրքիայի վարչապետ Ահմեդ Դավութօղլուն հերքել է արեւմտյան լրատվամիջոցներում տարածված տեղեկությունն այն մասին, որ «Իսլամական պետություն» խմբավորման շարքերը զգալիորեն ամրապնդվում են իր երկրի քաղաքացիների հաշվին: Նրա խոսքով, եվրոպական երկրներից ծայրահեղականների շարքերում շատ ավելի մեծ թվով զինյալներ են ընդգրկվում, քան Թուրքիայից:
Այս մասին նա հայտարարել է թուրքական զորքերի կողմից բռնագրավված Կիպրոսի հյուսիսային հատվածում, ուր վարչապետի պաշտոնում առաջին այցն է կատարել: Ըստ ԻՏԱՌ ՏԱՍՍ-ի, Դավութօղլուն ընդգծել է, որ Անկարան «անում է ամեն ինչ, որպեսզի զսպի «Իսլամական պետության»-ը պոտենցիալ միացողների հոսքը»: Նա նաեւ եվրոպական երկրներին ավելի սերտ համագործակցության կոչ է արել՝ Սիրիա օտարերկրյա զինյալների հոսքի դեմ պայքարելու համար:
Թուրքիայի վարչապետը, միաժամանակ, ընդգծել է, որ Սիրիայի հետ Թուրքիայի սահմանը բաց է փախստականների ընդունելու համար, ովքեր ձգտում են փրկվել ռազմական գործողություններից:
Երեքշաբթի The New York Times-ը գրել էր, որ Թուրքիան ՆԱՏՕ-ի անդամ երկրների շրջանում «Իսլամական պետության»-ը զինյալներ մատակարարող խոշորագույն պետությունն է: Պարբերականի տվյալներով, ներկայում խմբավորման շարքերում շուրջ 1.000 թուրքական քաղաքացիներ կան, հիմնականում՝ երիտասարդներ, ովքեր զենք են վերցրել գաղափարական կամ նյութական նկատառումներով:
