Քառյակի քաղաքական ուժերին ավելի շատ միավորում են տակտիկական նպատակները, քան ռազմավարական. նրանց պատկերացումները ապագա զարգացումների վերաբերյալ, կարելի է ասել, տարբեր են: Այս մասին, այսօր՝ սեպտեմբերի 17-ին, լրագրողների հետ հանդիպման ժամանակ հայտարարել է Միջազգային եւ անվտանգության հարցերի հայկական ինստիտուտի ղեկավար Ստյոպա Սաֆարյանը:
Նրա խոսքով՝ ՀԱԿ-ը եւ «Ժառանգությունը» լավագույն դեպքում չեն բացառի «հեղափոխություն ներքեւից» տարբերակը, այսինքն՝ ժողովրդական լայն մասնակցային շարժումներով, իսկ ԲՀԿ-ն առաջին հերթին տեսնում է 2017-18թթ. ընտրափուլերի միջոցով սահուն իշխանափոխության տարբերակը:
Անդրադառնալով սահմանադրական բարեփոխումների թեմային, Սաֆարյանը նկատել է, որ ՀՀԿ-ի համար կարեւոր է սահմանադրական բարեփոխումների խնդիրը՝ իշխանության վերարտադրության խնդիրը լուծելու տեսանկյունից, ինչպես նաեւ ԲՀԿ-ի եւ ՀԱԿ-ի կողմից խաղի կանոնների փոփոխություն թույլ չտալու տեսանկյունից: Նրա խոսքով՝ ԲՀԿ-ն ակնկալում է կրկին անել այն փորձը, ինչ արվեց 2012թ.՝ իրեն հասու եղանակներով. ստանալ քվեների մեծամասնություն եւ կառավարություն կազմավորելու իրավունք, սակայն դա չհաջողվեց:
Փորձագետի կարծիքով՝ ՀԱԿ-ը եւ Լեւոն Տեր-Պետրոսյանը կատեգորիկ դեմ են կառավարման համակարգի փոփոխությանը, մինչդեռ ԲՀԿ-ի դեպքում չի բացառվում, որ ինչ-ինչ տարբերակների դեպքում նրանք «այո» ասեն բարեփոխումներին:
