Շոտլանդացի հրշեջը երկու տարվա ազատազրկման է դատապարտվել, քանի որ հրդեհներ էր կազմակերպել եւ գործընկերներին օգնել դրանք մարելիս, գրում է The Herald-ը:
Կամավորական հրշեջ խմբի հրամանատարի տեղակալ Դեյվիդ ՄաքՔեյը մեղավոր է ճանաչվել երկու հրդեհների կազմակերպման համար: 2013 թ. մարտի դեպքը 42 հազար ֆունտի (52,8 հազար եվրո) վնաս էր հասցրել: Մի քանի օր անց մեղադրյալը հրդեհել էր նո տնկիները՝ Ստրոնտիան գյուղի հարեւանությամբ: Հրդեհը հաջողվել էր մարել միայն երկու օր անց:
Երկու դեպքում էլ 40-ամյա հրշեջը կրակի դեմ պայքարել է գործընկերներին հավասար, իսկ մի անգամ էլ արժանացել է կրկնակի աշխատավարձի, քանի որ այդ օրը պետական տոն է եղել, փոխանցում է ԻՏԱՌ-ՏԱՍՍ-ը:
Վկաները նրան ճանաչել են ջրի մատակարարման սպիտակ ֆուրգոնից, որտեղ նա նույնպես աշխատել է կես դրույքով: Մի քանի մարդ նկատել է մեքենան հրդեհներից անմիջապես առաջ՝ դեպքի վայրերից քիչ հեռու: Մեքենայում տեղադրված GPS-նավիգատորի շնորհիվ, որը գրանցել է բոլոր տեղաշարժերը, հանցագործի մեղքն ապացուցվել է:
ՄաքՔեյը հրշեջ ծառայության կամավոր է ծառայել 21 տարի: Անցյալ տարի մասնագիտական գործունեության քսանամյակի կապակցությամբ պարգեւատրվել էր շքանշանով: