Արցախի իշխանություններն անընդունելի են համարում շփման գծում լարվածության պահպանման նպատակով պարբերաբար սադրանքների կազմակերպման Ադրբեջանի գործելաոճը՝ որի զոհն են դառնում թե՛ զինվորականները, թե՛ քաղաքացիական բնակչությունը։ Այդ մասին NEWS.am-ի թղթակցի հետ զրույցում հայտնել է Լեռնային Ղարաբաղի արտգործնախարար Կարեն Միրզոյանը՝ մեկնաբանելով այսօր, ղարաբաղա–ադրբեջանական շփման գծում հակառակորդի կրակոցից 24-ամյա ավագ լեյտենանտ Մհեր Հակոբյանի սպանությունը:
«Մեր խորին ցավակցությունն ենք հայտնում Մհեր Հակոբյանի ընտանիքին, հարազատներին եւ ծառայակիցներին: Անընդունելի ենք համարում շփման գծում լարվածության պահպանման նպատակով պարբերաբար սադրանքների կազմակերպման Ադրբեջանի գործելաոճը՝ որի զոհն են դառնում թե՛ զինվորականները, թե՛ քաղաքացիական բնակչությունը»,- նշել է Միրզոյանն ու հավելել. «Օգոստոսի 9-ին Սոչիում Ռուսաստանի դաշնության նախագահ Վլադիմիր Պուտինի հրավերով վերջինիս եւ Հայաստանի ու Ադրբեջանի նախագահների միջեւ տեղի ունեցած հանդիպումից եւ սեպտեմբերի 4-ին Նյուպորտում կայացած Հայաստանի նախագահ Սերժ Սարգսյանի, Ադրբեջանի նախագահ Իլհամ Ալիեւի եւ ԱՄՆ պետքարտուղար Ջոն Քերիի եռակողմ հանդիպումից հետո սա հրադադարի կոպիտ խախտման առաջին դեպքն է, որը հանգեցրել է մարդկային զոհի եւ դրա հետեւանքով իրավիճակի սրացման ողջ պատասխանատվությունը կրում են Ադրբեջանի քաղաքական եւ ռազմական իշխանությունները»։
Նա կոչ է արել միջազգային հանրությանը մեծացնելու ճնշումն Ադրբեջանի վրա՝ ընդունելու առաջնային գծից դիպուկարահների դուրս բերման, միջադեպերի քննության մեխանիզմ ստեղծելու վերաբերյալ ԵԱՀԿ Մինսկի խմբի համանախագահների առաջարկությունները, որոնց բազմիցս իրենց աջակցությունն են հայտնել հայկական կողմերը եւ որոնց կիրառումը հնարավորություն կընձեռի խուսափելու հավերյալ զոհերից եւ նվազեցնելու լարվածությունը շփման գծում։
