Հայաստանում կիբերհանցագործությունների 103 դեպք է արձանագրվել 2013-2014թթ.: Այս մասին այսօր՝ սեպտեմբերի 18-ին, լրագրողներին ասաց Ոստիկանության կազմակերպված հանցավորության դեմ պայքարի գլխավոր վարչության 3-րդ վարչության պետ, ոստիկանության գնդապետ Տիգրան Պետրոսյանը:
«Ոչ միայն այս ոլորտի հանցագործություններն են աճում, այլ նաև դիմելիության մակարդակն է աճում: Ավելորդ է մանրամասնել կիբերհանցագործության պատճառները»,-ասաց նա՝ ավելացնելով, որ վերջին ժամանակներում արձանագրվել են գործարար նամակագրության մեջ մտնելու դեպքեր, ինչպես նաև սիրախաղի միջոցով հափշտակումները, որոնք ամենամեծ տոկոսն են կազմում այդ տեսակի հանցագործությունների ընդհանուր թվում:
Վարչության պետի խոսքով՝ կիբերհանցագործությունների հիմնական զոհերը երիտասարդ կանայք են:
«Ավտոմեքենաների առևտրի ժամանակ են նման դեպքեր գրանցվում, երբ, ասենք, մեքենայի իրական արժեքը հարյուր հազար դոլար է, անձը փորձել է ձեռք բերել ավելի էժան և դարձել խարդախության զոհ»,- ասաց Տիգրան Պետրոսյանը՝ նշելով, որ ամեն օր ավելանում են նման փորձերը։
Տիգրան Պետրոսյանը նշեց, որ նման հանցագործությունների կանխարգելումն ու բացահայտումը իրենց բաժնի հիմնական առաքելությունն է:
