2013թ. Հայաստանում արձանագրվել է սոցիալական ցանցերով անառակաբարո գործողությունների երկու դեպք, երկու դեպքում էլ հանցագործությունն սկիզբ է առել սոցիալական ցանցով, նամակագրությամբ: Այս մասին այսօր՝ սեպտեմբերի 18-ին, լրագրողներին ասաց Ոստիկանության կազմակերպված հանցավորության դեմ պայքարի գլխավոր վարչության 3-րդ վարչության պետ, ոստիկանության գնդապետ Տիգրան Պետրոսյանը։
«Արձանագրվել են նաև մանկական պոռնոգրաֆիա ներկայացնելու, պոռնկական նյութեր տարածելու դեպքեր: Դրանք հիմնականում կատարվում են նախապես մշակված ձևերով»,-ասաց նա:
Տիգրան Պետրոսյանը նշեց, որ այս հանացագործությունների զոհ դառնում են հիմնականում երեխաները:
«Եզակի են պոռնկագրական նյութերի տարածումներն am տիրույթում: Մենք զրպարտության դեպքեր ևս ունենք, բայց դրանք չեն քրեականացվում: Համագործակցությունը սոցիալական ցանցերի հետ իրականացվում է բացառապես օրենքի սահմաններում: Հիմնականում թիրախային այն կայքերն են դիտարկվում, որոնց միջոցով հնարավոր է հանցագործության մասին տեղեկություն ձեռք բերել»,- հավելեց վարչության պետ Տիգրան Պետրոսյանը: