Երեւանում որոշ անբարեխիղճ քաղաքացիները իրենց բնակարաններում նորոգման աշխատանքների իրականացումից հետո շինարարական թափոնները լավագույն դեպքում թողնում են աղբախցերի կամ աղբամանների մոտ, երբեմն էլ դատարկում ուր պատահի`անգամ կանաչ գոտիներում: Այս մասին հաղորդագրություն է տարածել Երեւանի քաղաքապետարանի մամուլի ծառայությունը:
«Երեւանի քաղաքապետ Տարոն Մարգարյանի հանձնարարությամբ, աղբահանության եւ սանիտարական մաքրման ամենօրյա աշխատանքներին զուգահեռ, մայրաքաղաքի վարչական շրջաններում ընթանում են չնախատեսված վայրերում կուտակված աղբի, ինչպես նաեւ շինաղբի տեղափոխման աշխատանքներ: Այս գործընթացում վարչական շրջանների սանմաքրման եւ կանաչապատման ձեռնարկություններին տեխնիկապես աջակցում է Երեւանի քաղաքապետարանը:
Հիշեցնենք, որ վարչական իրավախախտումների վերաբերյալ ՀՀ օրենսգրքի համաձայն՝ չսահմանված վայրերում աղբամուղներից, աղբահավաք խցերից, աղբարկղերից, աղբամաններից, աղբահավաք մեքենաներից, ինչպես նաեւ սահմանված կարգով կազմակերպված եւ նախատեսված աղբավայրերից դուրս աղբ թափելու համար կիրառվում է տուգանք. ֆիզիկական անձանց դեպքում`սահմանված նվազագույն աշխատավարձի քսանապատիկից մինչեւ երեսնապատիկի չափով, պաշտոնատար անձանց դեպքում`քառասնապատիկից մինչեւ հարյուրապատիկի չափով»: