Ազգային ժողովի «Բարգավաճ Հայաստան» խմբակցության պատգամավոր Ռուբեն Գեւորգյանն («Ծաղիկ Ռուբոն») այսօր՝ սեպտեմբերի 20-ին, «Փարավոն» ժամանցային համալիրում անց է կացնելու իր «Երդվյալ ազատամարտիկների» միության համագումարը: NEWS.am-ի թղթակցի հետ զրույցում Ռուբեն Գեւորգյանն ասաց հետեւյալը. «Քանի որ հայրենիքի համար իրենց կյանքը չխնայած, պատերազմի առաջին գծում կռված տղերքով համալրված կազմակերպությանն իրենց համագումարը անցկացնելու համար չտրամադրվեց պետությանը պատկանող ոչ մի շենք ու շինություն, իհարկե, մեզ էլ ձեռք մեկնող եղավ, եւ եղավ այն մարդը, ով բոլորին է ձեռք մեկնում: Համագումարը անց եմ կացնելու «Փարավոն» բացօթյա ռեստորանային համալիրում»:
ԵԱՄ հիմնադիր-նախագահն ասաց, որ համագումարին հրավիրվածները շատ քիչ են: Նա հրավիրել է ՀՀ-ի եւ ԼՂՀ-ի բաձրագույն ղեկավարությանը, հրավիրել է Հայաստանի երեք նախագահներին, ՀՀ եւ ԼՂՀ վարչապետներին, ԱԺ նախագահներին, պաշտպանության նախարարներին, ինչպես նաեւ ազատագրական պայքարի մասնակցած 3-4 արժանավոր ընկերների: «Ես չեմ ցանկացել, որպեսզի համագումարիս քանակությունը ապահովեմ հրավիրյալներով»,-ասաց պատգամավորը:
Ինչ վերաբերում է ԵԱՄ համագումարի համար վայր հատկացրած ԲՀԿ առաջնորդ Գագիկ Ծառուկյանին հրավիրելուն, Ռուբեն Գեւորգյանը նշեց, որ իր թիմի համար այս իրավիճակում նա հրավիրյալներից էլ բարձրյալ կարգավիճակում է, հետեւաբար՝ միայն ողջունելի եւ ուրախ կլինեն նրան տեսնել համագումարին:
NEWS.am-ի տեղեկություններով՝ Ռուբեն Գեւորգյանը չի հրավիրվել գեներալ զույգին՝ ԱԺ «Հանրապետական» խմբակցության պատգամավորներ, ԵԿՄ ղեկավար Մանվել Գրիգորյանին եւ Սեդրակ Սարոյանին: Առհասարակ որեւէ պատգամավորի, այդ թվում՝ ԲՀԿ խմբակցությունից ես հրավիրվյալներ չկան:
