ՀԱԿ-ի, ԲՀԿ-ի եւ «Ժառանգության» հոկտեմբերի 10 -ի հանրահավաքում Հայաստանի՝ ԵՏՄ-ի անդամակցության չանդրադառնալը մեկնաբանելու իմաստ չկա: Այս մասին NEWS.am-ի թղթակցի հետ զրույցում ասաց Ռազմավարական եւ ազգային հետազոտությունների հայկական կենտրոնի տնօրեն Մանվել Սարգսյանը:
Նա նշեց, որ այդ ուժերը ժամանակին ասել են, որ այդ ամենը անշրջելի է, չեն էլ գնահատել, ուղղակի ասել են, որ դա իրենց չի հետաքրքրում: «Շատ մեկնաբանություններ կան դրա հետ կապված, իմաստը ո՞րն է մեկնաբանել, այն անձինք, ում համար դա կարեւոր հարց է, չեն գնալու հանրահավաքին: Բավականին մեկնաբանություններ կան, որ դրանք պրոռուսական ուժեր են, դրանք կուսակցություններ էլ չեն: Ես իմ տեսակետը հայտնել եմ, որ Հայաստանում քաղաքական կյանք գոյություն չունի, ամեն ինչը վերցված է, հարաբերություններ են իրար հետ ստեղծում կուսակցության տեսքով հանդես եկող այդ խմբավորումները, լուրջ քաղաքական դիրքորոշումներ սպասելը դժվար է: Մարդիկ իրենց խնդիրն են դնում՝ Սերժ Սարգսյանի ռեժիմը, կամ ընդհանրապես դիրքորոշում չունեն, միասնական չեն, հիմա էլ քառյակը եռյակ է դարձել, էլ ի՞նչ սպասել այստեղ: Պիտի լինի քաղաքական կյանք, քաղաքական կառույցներ, քաղաքական խնդիրներ, այդ ժամանակ կարելի է այս կամ այն դիրքորոշումը մեկնաբանել: Բայց հիմա բոլորի համար պարզ է, հանրապետականը տիրացել է պետական լծակներին, ուրիշներն էլ ինչ-որ հարաբերություններն են պարզում այդ խմբավորման հետ ինչ նպատակներով, թող իրենք պարզեն»,-ասաց Մամվել Սարգսյանը:
Նա շեշտեց, որ այն ինչ կատարվում է, քաղաքագետի մեկնաբանելու կարիք չկա, պետք է քաղաքականություն լինի, որ քաղաքագետը խոսի, այլապես նույն հաջողությամբ լրագրողները նրան կարող են զանգահարել եւ ասել, որ ինչ-որ տեղ հարսանիք է եղել եւ նման բան են ասել: «Երկրում օրինական իշխանություն չկա, պետական համակարգը զավթված է մի խմբավորման կողմից, ուրիշ խմբավորումներն էլ հարաբերություն են ստեղծում այդ խմբավորման հետ, միակ քաղաքագիտական գնահատականը սա է»,-հավելեց Մանվել Սարգսյանը: