Ժամկետային զինծառայող Լյուքս Ստեփանյանի սպանության մեղադրանքով նրա ծառայակից Դավիթ Խաչատրյանին 17 տարվա ազատազրկման դատապարտելու որոշումը կայացվել է պաշտպանության նախարար Սեյրան Օհանյանի եւ գլխավոր դատախազ Գեւորգ Կոստանյանի հայտարարությունների հիման վրա։ Այս մասին ՀՀ Վերաքննիչ դատարանում այսօր՝ սեպտեմբերի 19-ին, հայտարարեց Դավիթ Խաչատրյանի փաստաբան Երեմ Սարգսյանը՝ վերաքննիչ բողոքն ընթերցելիս։
«Խնդրում եմ բեկանել առաջին ատյանի դատարանի որոշումը եւ կայացնել զենքի հետ վարվեցողության կանոները խախտելու հիմքով դատավճիռ, կամ գործն ուղարկել առաջին ատյանի դատարան նոր քննության, քանի որ նախաքննության եւ դատաքննության ողջ ընթացքի վրա ազդել է Սեյրան Օհանյանի այն արտահայտությունը, որ Դավիթ Խաչատրյանը դիտավորյալ սպանություն է կատարել։ Բացի այդ նախաքննության ընթացքում դատախազ Կոստանյանը բազմիցս հայտարարություններ է արել, որ Դավիթ Խաչատրյանը մեղավոր է»,-ասաց նա։
Երեմ Սարգսյանը նաեւ նշեց, որ դատաքննության ընթացքում տուժող կողմի ներկայացուցիչները բազմիցս վիրավորել են իրեն եւ իր պաշտպանյալին, սակայն դատարանը դրանց գնահատական չի տվել։
Դրանից հետո փաստաբան Երեմ Սարգսյանը դատարանին խնդրեց հետաձգել դատը, քանի որ ինքը վատառողջ է, եւ բարձր ջերմություն ունի։
Նշենք, որ այսօր առաջին անգամ դատարան էր ներկայացել գործով տուժող, գլխից հրազենային վնասվածք ստացած Հրաչյա Սարգսյանը, որը դատարանին հայտնեց, որ իր հիշողությունը վերականգնվել է, եւ ինքը ցանկանում է արտահերթ ցուցմունք տալ, սակայն դատարանը մերժեց խախտել դատավարության կարգը։
Երեմ Սարգսյանը NEWS.am-ին ասաց, որ դատարանը սխալ որոշում կայացրեց՝ չբավարարեցլով իր միջնորդությունը եւ տուժող Հրաչյա Սարգսյանին ցուցմունք տալու հնարավորություն չտալով։
«Կարծում եմ, որ դատարանը պիտի թույլատրեր Հրաչյա Սարգսյանին ցուցմունք տալ, քանի որ վատառողջ էր մարդը, ու հնարավոր է՝ մյուս դատական նիստին էլ չգա»,-ասաց նա։
Նշենք, որ Հրաչյա Սարգսյանն արդեն քայլում է, եւ հոր խոսքով՝ հիշողությունը մասամբ վերականգնվել է։
Հաջորդ դատական նիստը նշանակվեց սեպտեմբերի 22-ին։
Հիշեցնենք, որ ողբերգությունը կատարվել էր 2013թ. մայիսի 15-ին, ժամը 15:30-ի սահմաններում, Հայաստանի ՊՆ N զորամասի պահակախմբի մուտքի դիտորդ, ժամկետային զինծառայող, 19-ամյա շարքային Դավիթ Ռաֆայելի Խաչատրյանն իրեն ամրակցված ԱԿՄ տեսակի ինքնաձիգից կրակոց էր արձակել, ինչի հետեւանքով պահակախմբում ընդգրկված ժամկետային զինծառայող, շարքային Լյուքս Ստեփանյանը գլխի շրջանում ստացած հրազենային վիրավորումից տեղում մահացել էր, իսկ նույն զորամասի ժամկետային զինծառայող, շարքային Հրաչյա Վաղինակի Սարգսյանը գլխի շրջանում հրազենային վիրավորում էր ստացել: Դավիթ Խաչատրյանը, որը պնդում էր, որ կատակով է կրակել, զենքը ուղիղ Լյուքսի վրա չի պահել, եւ գնդակն անդրադարձով է դիպչել Լյուքսին, մեղավոր է ճանաչվել Տավուշի մարզի առաջին ատյանի դատարանի կողմից եւ դատապարտվել 17 տարվա ազատազրկման։
