Խորհրդարանական ոչ իշխանական ուժերը, որոնք դեմ են սահմանադրական բարեփոխումներին, կարող են նախագահական ընտրությունների ժամանակ հաղթել, բայց դա ոչ մի փոփոխության չի բերի: Այս մասին այսօր՝ սեպտեմբերի 19-ին, «Հայաստան-Սփյուռք» հինգերորդ համաժողովի ժամանակ լրագրողների հետ զրույցում ասաց ՀՅԴ Բյուրոյի ներկայացուցիչ Հրանտ Մարգարյանը:
«Մեր երկրի խնդիրները համակարգային փոփոխությունների կարիք ունեն, իրենք էլ էին համաձայն դրան մի քանի տարի առաջ: Այսօր պատահել է այն, որ որոշները կարծում են՝ կարող են ստեղծել անձի իշխանություն: Նախագահական ընտրության ժամանակ իրենք կարող են ընտրություն շահել, բայց պետք է Սերժը փոխարինվի մեկ ուրիշ Սերժով, ոչ մի բան չի փոխվի»,-ասաց նա: Լրագրողների հարցին՝ արդյոք ինքը ԲՀԿ-ին նկատի ունի, Հրանտ Մարգարյանը պատասխանեց՝ իրենցից հարցրեք:
Հիշեցնենք, որ սեպտեմբերի 17-ի՝ քառյակի փակ նիստից հետո ԲՀԿ խմբակցության քարտուղար Նաիրա Զոհրաբյանը լրագրողներին ասել էր, որ ՀՅԴ-ն չի մասնակցի հոկտեմբերի 10-ին Ազատության հրապարակում կայանալիք միասնական հանրահավաքին, այն հիմնավորմամբ, որ կան էական տարակարծություններ սահմանադրական փոփոխությունների հարցում։