Քառյակը (ՀԱԿ, ԲՀԿ, ՀՅԴ, «Ժառանգություն») արտաքին քաղաքական խնդիրների շուրջ չի խոսում, սրպեսզի լուծեն գլխավոր խնդիրը, ոչ թե ածանցյալը: Այս մասին NEWS.am-ի թղթակցի հետ զրույցում ասաց «Ժառանգության» փոխնախագահ Արմեն Մարտիրոսյանը:
Նա նշեց, որ ի սկզբանե, երբ այս համագործակցությունը սկսվել է, եղել է բացառապես ներքաղաքական հարցերի շուրջ, պայմանավորվածությունը այդպիսին է: «Ցանկացած պարագայում Հայաստանի խնդիրները ոչ թե արտաքին դաշտով են պայմանավորված, այլ ներքին, որովհետեւ բոլոր արտաքին խնդիրները գալիս են ներքին խնդիներից, արտաքին քաղաքականությունը ներքին քաղաքականության շառավիղն է, որպեսզի ունենանք նորմալ հավասարակշռված, ոչ ճոճանակային, պահի ազդեցությամբ չպայմանավորված քաղաքականություն, անհրաժեշտ է, որ երկրում լինեն լեգիտիմ իշխանություններ, որոնք պատասխանատու են ժողովրդի առջեւ: Պարզ է, որ Եվրասիական տնտեսական միությանը անդամակցելու Հայաստանի իշխանությունների ցանկությունը եւս տեղավորվում է ոչ լեգիտիմ իշխանություններ ուհենալու հանգամանքին,
եթե մենք ունենային լեգիտիմ իշխանություններ, միանշանակ խուսափած կլինեինք Եվրասիական տնտեսական միության կազմի մեջ մտնելուց: Այդ երկու պատճառներն են, որ արտաքին քաղաքական հարցերի շուրջ խոսք չի գնում 4 ուժերի հանդիպման ժամանակ,
ամբողջ ժամանակ որեւէ նմանատիպ խոսակցություն չի եղել, հակառակ դեպքում ամեն մեկս մեր մոտեցումը պետք է պնդեինք»,-նշեց Արմեն Մարտիրոսյանը:
