Գեներալ-մայոր Արկադի Տեր-Թադեւոսյանը (Կոմանդոս) այսօր՝ սեպտեմբերի 20-ին, «Երդվյալ ազատամարտիկների միության» համագումարին հանդես եկավ ազատամարտիկների բոլոր միություններին ուղղված կոչով՝ ոչ թե մրցակցել միամյանց հետ, այլ համատեղ աշխատել:
«Բոլոր կամավորական միությունները չպետք է մրցակցեն, այլ պետք է համատեղ աշխատեն, ուստի բոլոր կամավորական միությունններին կոչ եմ անում նույն խնդիրն ունենալ, որը նաեւ մեր ժողովրդի խնդիրն է՝ խաղաղություն հաստատել եւ այդ ամենը կախված է մեզանից»,-ասաց նա:
ԲՀԿ-ական պատգամավոր Ռուբեն Գեւորգյանի (Ծաղիկ Ռուբո) գլխավորած միության երրորդ արտահերթ համագումարի այցելած ազատամարտիկներին դիմելով՝ Կոմանդոսն ասաց, որ նրանք օրինակ են ծառայում այսօրվա սերնդի համար:
«Մարտական ընկերներ, դուք մեր ազգի համար ստեղծել եք հերոսության, արիության բարձր մակարդակ, այս ամենը տվել եք մեր երիտասարդ սպաներին, զինվորներին, որոնք այսօր կանգնած են թշնամու առաջ: Քանի դեռ դուք կաք եւ ոգեւորում եք մեր երիտասարադությանը, որը ծառայում է մեր զինված ուժերում, հակառակորդը բոլոր ժամանակներում կփախչի մարտի դաշտից»,-ասաց Կոմանդոսը:
Գեներալ-մայորի խոսքով՝ պետք է չթերագնահատել թշնամու հնարավորությունները, սակայն պետք է չկասկածել, որ պատերազմի դեպքում հայ ազգը նորից հաղթելու է:
«Մենք գիտենք, որ Ադրբեջանի բանակը անմարտունակ է, չնայած նրան, որ նրանք ունեն մեծաքանակ ռազմական տեխնիկա: Մենք ձեզ հետ այս ամենի միջով անցել ենք, մենք դա գիտենք, մենք այն ժամանակ էլ հաղթում էինք, եւ սովորեցրինք նրանց փախչել: Մեր ժողովուրդը պատերազմ չի ուզում, մենք պատերազմից չենք վախենում, բայց եթե հակառակորդը մեզ պատերազմ պարտադրի, մենք իրենց արդեն լողալ կսովորեցնենք»,-ասաց Կոմանդոսը:
Կոմանդոսը հավաքված ազատամարտիկներին նաեւ շնորհավորեց անկախության 23-րդ տարելիցի կապակցությամբ, նրանց մաղթեց հաջողություն եւ առողջություն:
