Արդի 21-րդ դարը բնութագրվում է տնտեսական ճգնաժամերով, տեղային պատերազմներով ողջ աշխարհում, եւ ամեն անգամ նման ճգնաժամն իրենից լուրջ մարտահրավեր է ներկայացնում ղարաբաղյան հարցի կարգավորման գործընթացին: Այդ մասին սեպտեմբերի 20-ին «Հայաստան-սփյուռք» 5-րդ ֆորումին մասնակից հայկական սփյուռքի ներկայացուցիչների հետ հանդիպման ընթացքում հայտարարել է Հայաստանի պաշտպանության նախարար Սեյրան Օհանյանը՝ պարզաբանելով, որ Բաքուն շփման գծում լարվածություն է ստեղծում՝ օգտվելով նման ամեն ճգնաժամից:
Նախարարի խոսքով, տրամաբանական է, որ «Հայաստան-սփյուռք» ֆորումի նման միջոցառումն անցկացվում է հենց սեպտեմբերին՝ Հայաստանի անկախության նախօրեին: Ինչպես ցույց են տվել եռօրյա ֆորումի արդյունքները, նշել է Սեյրան Օհանյանը, հայ ժողովուրդը լուրջ ուշադրություն է դարձնում որոշ առաջնահերթ հարցերի: «Առաջին հերթին, դա Ցեղասպանության 100-ամյա տարելիցն է. բոլոր հայերը միավորել են ջանքերն այդ հանցագործության միջազգային ճանաչման շրջանակներում, եւ բավական լուրջ աշխատանք է տարվում այդ ուղղությամբ: Կարեւոր է նաեւ այն խնդիրների լուծումը, որոնք ծագել են Սիրիայում եւ Իրաքում տեղի ունեցած իրադարձությունների հետեւանքով»,- ընդգծել է պաշտպանության նախարարը՝ առաջնահերթ հարցերի շարքում նշելով սփյուռքում հայոց լեզվի պահպանության հարցը:
