Սպարապետ Վազգեն Սարգսյանի եղբայր, պաշտպանության նախարարի խորհրդական Արմեն Սարգսյանը համոզված է, որ եղբոր ողջ լինելու դեպքում Հայաստանում ազատամարտիկների այսքան շատ միություններ, հասարակական կազմակերպություններ չէին լինի:
«Ազատ երկրում ենք ապրում եւ յուրաքանչյուրն ունի իրավունք իր կարծիքը հայտնելու: Սա պառակտում չէ, պարզապես յուրաքանչյուրը լիդեր լինելու խնդիր ունի: Կարծում եմ, որ եթե Վազգենը ողջ լիներ, ապա այսքան շատ միություններ չէին լինի: Վազգենը հաստատ կողմ չէր լինի, իր սրտով չէր լինի»,- NEWS.am-ի թղթակցի հետ ասաց Արմեն Սարգսյանը՝ պատասխանելով հարցին՝ արդյոք Սպարապետը կցանկանար, որ այսքան շատ միություններ լինեին, իսկ ազատամարտիկներն էլ պառակտված:
Որպես պաշտպանության նախարարի խորհրդական՝ Արմեն Սարգսյանն աշխատում է ազատամարտիկների, վիրավորների հետ, փորձում լուծել նրանց սոցիալ-տնտեսական խնդիրները,. ինչպես նաեւ օգնել զոհված հերոսների ընտանիքներին:
«Ինձ համար էլ հեշտ կլիներ աշխատել 10-20 կազմակերպությունների հետ: Առհասարակ չկա մի խնդիր, որը կարողանանք լուծել ու չլուծենք: Ում կարողանում ենք, օգնում ենք, եթե նախարարը հնարավորություն է ունեցել: Ինձ դիմած ազատամարտիկների խնդիրները լուծվեն են»,- ավելացրեց նա:
Նշենք, որ բացի Վազգեն Սարգսյանի ստեղծած Երկրապահ կամավորների միությունից, որի նախագահն այժմ գեներալ Մանվել Գրիգորյանն է, ԱԺ ԲՀԿ-ական պատգամավորներ Ռուբեն Գեւորգյանն ու Ռուստամ Գասպարյանն էլ իրենց հերթին առանձին-առանձին ստեղծել են նոր կառույցներ՝ «Երդվյալ ազատամարտիկների» միություն: