NEWS.am-ին նոր մանրամասներ են հայտնի դարձել Կոտայքի մարզում հայտնաբերված գործարար կնոջ մասին: Մեր տեղեկություններով՝   68-ամյա Սիլվա Գալստյանը ունի երկու երեխա՝ որդի ու դուստր, նրա սպանության մեջ մեղադրվողը որդու տղան է՝ 23-ամյա Ալբերտ Մոմջյանը:

Վերջինս գործարար կնոջ որդու առաջին ամուսնությունից ունեցած զավակն է, դրանից հետո նրա որդին երկրորդ անգամ է ամուսնացել: 68-ամյա Սիլվա Գալստյանը շատ լավ է վերաբերվել այդ թոռանը, ամեն շաբաթ գումար է տվել կարիքները հոգալու համար, բայց դա կարծես չի  բավարարել նրան:

NEWS.am-ի աղբյուրները հայտնեցին, որ Ալբերտ Մոմջյանը գնացել է տատիկի՝ Երեւանում գտնվող բնակարան, թե մեքենադ տուր եւ այլն, Սիլվա Գալստյանն էլ մերժել է նրան: Դրանից հետո թոռը տատին սպանել է հենց նրա տան մեջ, հարվածներ հասցրել, այնուհետեւ բարձով խեղդել: Ալբերտ Մոմջյանը տատու դին տեղափոխել է հենց նրա մեքենայով, այնուհետեւ հետքերը վերացնելու նպատակով տարել ու այրել է: Դրանից հետո Ալբերտ Մոմջյանը վերադարձել է, տատու տնից վերցրել նրա ոսկեղենը՝ մոտ 20 հազար դոլար արժողությամբ եւ տարել գրավադրել: Ալբերտ Մոմջյանը կալանավորված է, սակայն չի ընդունում իրեն առաջադրված մեղադրանքը:

Մեր տեղեկություններով՝ Սիլվա Գալստյանը ոչ միայն «Օժիտ» խանութների ցանցի սեփականատերն է, այլեւ նրան է պատկանում Ավանում գտնվող «Գուտապի» շենքը եւ ապակետարաների գործարանը:

Հիշեցնենք, որ Ոստիկանության Երեւան քաղաքի վարչության քրեական հետախուզության բաժնի եւ ոստիկանության Կենտրոնական բաժնի աշխատակիցները Հայաստանի Քննչական կոմիտեի Կենտրոնական քննչական բաժնի քննիչների հետ ձեռնարկելով օպերատիվ-հետախուզական եւ քննչական համատեղ գործողություններ՝ երեկ՝ սեպտեմբերի 20-ին, Գառնի-Բանավան տանող ավտոճանապարհի վրա գտնվող կամրջին հարակից տարածքում հայտնաբերել են կնոջ այրված դի:

Shamshyan.com-ի փոխանցմամբ, ոստիկաններն ու քննիչները, ձեռնարկելով անհրաժեշտ գործողություններ, պարզել են մահացածի ինքնությունը. վերջինս Երեւան քաղաքի Կողբացի 44 շենքի 55 բնակարանի բնակչուհի, 68-ամյա Սիլվա Գալստյանն է, ում այս տարվա սեպտեմբերի 15-ից ոստիկանության Կենտրոնական բաժինը որոնում էր որպես անհայտ կորած: Փաստի առթիվ հարուցվել է քրեական գործ՝ ՀՀ քր.օր-ի 104 հոդվածի 1-ին մասի (դիտավորյալ սպանություն) հատկանիշներով:

Նրան սպանելու, այնուհետ դին այրելու կասկածանքով ձերբակալվել է Ս. Գալստյանի թոռը՝ 23-ամյա Ալբերտ Մոմջյանը: