Մանկապղծության համար 15 տարվա ազատազրկման դատապարտված եւ օրերս մահացած Սերոբ Տեր-Պողոսյանը դիմել էր Մարդու իրավունքների եվրոպական դատարան: Այս մասին հայտնեցին NEWS.am-ի աղբյուրները:
Իսկ թե այժմ նրա մահվանից հետո ինչպես է լուծվելու ՄԻԵԴ ներկայացված հայցադիմումը, մեր աղբյուրն ասաց, որ դեռ նրա հարազատների հետ չի խոսել, եթե նրանք լիազորություն տան եւ ցանկանան, կշարունակեն հայցը Եվրադատարանում:ՄԻԵԴ ներկայացված հայցը վերաբերում է նրան պատժից ազատելուն, մասնակորապես՝ ունենալով 4-րդ աստիճանի քաղցկեղ, նրանք իրավունք չունեին պահել Սերոբ Տեր-Պողոսյանին անազատության մեջ, քանի որ օրենքը թույլատրում է սկսած 3-րդ աստիճանի քաղցկեղից մարդուն չպահել անազատության մեջ: Հայցը ներկայացված է, բայց որեւէ պատասխան չկա:
Նշենք, որ Սերոբ Տեր-Պողոսյանը օգոստոսի 21-ին հիվանդանոց էր տեղափոխվել հերթական քիմիաթերապիայի կուրսն անցնելու նպատակով: Իսկ սեպտեմբերի 21-ին ժամը 09:05-ին «Նաիրի» բժշկական կենտրոնում մահացել է «Հրազդան» ՔԿՀ դատապարտյալ Սերոբ Տեր-Պողոսյանը: Նշանակվել է դատաբժշկական փորձաքննություն:
Հիշեցնենք, որ Ախթալայի լեռնահարստացման կոմբինատի սեփականատեր, ամերիկահայ գործարար Սերոբ Տեր-Պողոսյանին, Լոռիի մարզի ընդհանուր իրավասության դատարանը 2012թ նոյեմբերի 17-ին 15 տարվա ազատազրկման էր դատապարտել մանկապղծության համար: