Ռուսաստանը մասնակցելու է Բրիսբենում G20-ի գագաթաժողովին եւ մտադիր չէ փոխել այդ միջոցառման օրակարգը:
«G20-ի օրակարգը միշտ էլ շատ ծավալուն է եւ ընդարձակ: Ողջ տարվա ընթացքում նախապատրաստվոմ են այն հարցերի քննարկմանը, որոնք ներկայցվում են գագաթաժողովում` փորձագետների մակարդակով», - հայտարարել է ՌԴ նախագահի մամուլի քարտուղար Դմիտրի Պեսկովը:
Պեսկովը նաեւ հայտնել է, որ Ռուսաստանի նախագահ Վլադիմիր Պուտինը պատրաստվում է մասնակցել գագաթաժողովին, որը տեղի է ունենալու նոյեմբերի 15-16-ին` Ավստրալիայի Բրիսբեն քաղաքում:
Օգոստոսին ԱՄՆ պետքարտուղար Ջոն Քերին հայտարարել էր, որ վաղաժամ է համարում Ռուսաստանի նախագահ Վլադիմիր Պուտինին գագաթաժողովին հրավիրելու մասին խոսելը: Նա այդ անորոշությունը կապել էր Ուկրաինայի արեւելքում տեղի ունեցող իրադարձությունների հետ, փոխանցում է ԻՏԱՌ-ՏԱՍՍ-ը:
Սակայն G20 մասնակից երկրների մի շարք ներկայացուցիչներ արդեն հայտարարել են, որ Ռուսաստանը պետք է մասնակցի աշխարհի առաջատար տնտեսությունների այս միջազգային միավորման աշխատանքին: Ավստրալիայի վարչապետ Թոնի Էբոթը վճռական հայտարարել էր, որ ՌԴ նախագահը պետք է հրավիրվի Բրիսբեն` G20-ի գագաթաժողովին:
