Վերաքննիչ քրեական դատարանն այսօր՝ սեպտեմբերի 22-ին, անփոփոխ թողեց առաջին ատյանի դատարանի որոշումը եւ պարտադրեց «Հրապարակ» օրաթերթին եւ Ilur.am կայքին նշել աղբյուրը, որը հայտնել է Շիրակի ոստիկանապետի եւ ըմբշամարտի աշխարհի չեմպիոն Արթուր Ալեքսանյանի միջեւ տեղի ունեցած միջադեպի մասին: Այս մասին NEWS.am-ին ասաց գործով փաստաբան Տիգրան Եգորյանը:
Դատարանի որոշեց օրինական ուժի մեջ թողնել Երեւանի Կենտրոն եւ Նորք-Մարաշ վարչական շրջանների ընդհանուր իրավասության դատարանի որոշումը, որով լրատվամիջոցներին պարտադրվում է բացահայտել տեղեկատվության աղբյուրը:
Նշենք, որ առաջին ատյանի դատարան դիմել էր Հատուկ քննչական ծառայությունը:
Հիշեցնենք, որ ըստ մամուլի հրապարակումների՝ 2014թ. մայիսին Գյումրիում Վարդան Նադարյանը բռնություն էր կիրառել Արթուր Ալեքսանյանի նկատմամբ: ՀՔԾ-ն հրապարակումներն ընդունել էր որպես հանցագործության մասին հաղորդում եւ նյութեր նախապատրաստել:Ավելի ուշ հանցագործության դեպքի բացակայության պատճառով Հատուկ քննչական ծառայությունը մերժել էր քրեական գործ հարուցել: Կատարվածի վերաբերյալ հայ ըմբիշը որեւէ մեկնաբանություն չէր տվել, իսկ Նադարյանն էլ հերքել էր տեղեկությունը՝ նշելով, թե Արթուր Ալեքսանյանին չի ճանաչում, միայն հեռուստացույցով է տեսել:
