Համլիթոն (Օնտարիո նահանգ) քաղաքի ոստիկանությունը կալանավորել է 26-ամյա տղամարդուն, ով տեղական կաթոլիկ եկեղեցում փորձել է հարբած վիճակում սկանդալ սարքել, հաղորդում է CTV-ն: Ոստիկանության տվյալներով՝ հարբած տղամարդը մի կնոջ հետ մտել է սբ. Մարիա տաճար: Նրանք վեճի են բռնվել, սակայն այցելուների նկատողություենից հետո լքել են եկեղեցին: «Սակայն որոշ ժամանակ անց տղամարդը հետ է վերադարձել, ընդ որում՝ կիսամերկ», - հայտարարել են տեղի ոստիկանությունում: Խուլիգանը փորձել է «մկրտության սուրբ ջրով լոգանք ընդունել եւ ցանկացել է այրել զոհասեղանը: Այնուհետեւ նա թափանցել է այցելուների համար փակ տարածք, եւ գողացել տերողորմյան»: Դեպքի վայր ժամանած ոստիկանները տղամարդուն գտել են եկեղեցու մուտքի մոտ գետնին պառկած, հաղորդում է «ԻՏԱՌ-ՏԱՍՍ»-ը:
Այժմ տղամարդը կալանավորված է: Նրան տուգանել են 10 հազար դոլարով՝ խուլիգանության, գողության, հրդեհելու փորձի եւ ուրիշի ունեցվածքը փչացնելու համար: