NEWS.am-ին նոր մանրամասներ են հայտնի դարձել Արարատում երիտասարդների միջեւ տեղի ունեցած վիճաբանության ժամանակ:
Մեր աղբյուրների փոխանցմամբ՝ վիրավոր երիտասարդը՝ Տիգրանը, եւ մահացածը՝ Խաչիկը, ընկերներ էին, ապրում էնի Արարատում՝ նույն շենքում: Երկու երիտասարդներն էլ ամուսնացած չէին, վիրավոր երիտասարդը՝ Տիգրանը հոկտեմբերին պետք է ամուսնանա:
Մեր տեղեկություններով՝ Խաչիկը հոր հետ քարի արտադրամաս ունեին, որտեղ եւ աշխատում էր, իսկ Տիգրանը աշխատում է «Արարատ ցեմենտ» գործարանում: Ինչ վերաբերում է վիճաբանությանը, Տիգրանը բժիշկներին ասել է, թե ոչինչ չի հիշում եւ չգիտի, թե ինչի են վիճաբանել եւ ում հետ:
Ավելի վաղ NEWS.am-ը հայտնել էր, որ Արարատում, սեպտեմբերի 22-ին, վիճաբանություն է տեղի ունեցել մի խումբ երիտասարդների միջեւ, որն ավարտվել է նրանցից մեկի մահով: Կռվի ընթացքում երկու 24-ամյա երիտասարդներ՝ Տիգրան եւ Խաչիկ անուններով, ստացել են ազդրերի ու որովայնի շրջանում կտրող ծակող վնասվածքներ:
NEWS.am-ի տեղեկություններով, նրանք տեղափոխվել են Արարատի հիվանդանոց եւ որոշ ժամանակ անց Խաչիկը, որի վնասվածքը ազդրին է եղել, մահացել է: Նրանց վնասվածք պատճառած անձինք դեպքի վայրից դիմել են փախուստի եւ մինչեւ հիմա չեն հայտնաբերվել:
Քննչական կոմիտեից NEWS.am-ի թղթակցին հայտնեցին, որ դեպքի առթիվ հարուցվել է քրեական գործ Քրեական օրենսգրքի 112-րդ հոդվածի 2-րդ մասի 14-րդ կետի (դիտավորությամբ առողջությանը ծանր վնաս պատճառելը, որն անզգուշությամբ առաջացնելով տուժողի մահ, պատժվում է ազատազրկմամբ` 5-10 տարի ժամկետով) եւ 112-րդ հոդվածի 2-րդ մասի 1-ին կետի հատկանիշներով (երկու կամ ավելի անձանց նկատմամբ դիտավորությամբ առողջությանը ծանր վնաս պատճառելը):