Սյունիքի նախկին մարզպետ Սուրիկ Խաչատրյանի (Լիսկա) կինը՝ Լորետա Բարսեղյանը, հնարավոր է՝ այսօր՝ սեպտեմբերի 24-ին, ցուցմունք տա Արտակ Բուդաղյանի գործով։
Սյունիքի մարզի ընդհանուր իրավասության դատարանի Գորիսի նստավայրի դատավորը նախորդ նիստին որոշում էր կայացրել դատարանում վկայություն տալու համար բերման ենթարկել Սուրիկ Խաչատրյանի որդուն՝ Տիգրան Խաչատրյանին, վկա Կարինե Հարությունյանին և տուժող Նիկոլայ Աբրահամյանին։
NEWS.am-ի թղթակիցը հաղորդում է, որ այսօրվա նիստին ներկայացել են Սուրիկ Խաչատրյանի կինը՝ տուժող ճանաչված Լորետա Բարսեղյանը և վկաներ Զարզանդ Նիկողոսյանն ու Կարինե Հարությունյանը, Սուրիկ Խաչատրյանի որդին՝ Տրդատ Խաչատրյանը, իսկ Տիգրան Խաչատրյանը չի ներկայացել։ Մոր՝ Լորետա Բարսեղյանի խոսքով՝ նա այժմ բացակայում է Հայաստանից և գտնվում է Ռուսաստանի Դաշնությունում։ Տուժող Նիկոլայ Աբրահամյանը, որը Սուրիկ Խաչատրյանի ազգականն ու թիկնապահն է, նույնպես չի ներկայացել, նա բուժվում է Գորիսի բժշկական կենտրոնում, ինչի մասին ներկայացրել է համապատասխան տեղեկանք:
Հիշեցնենք, որ Արտակ Բուդաղյանին մեղադրանք է առաջադրվել այն բանի համար, որ նա, նախորդ տարվա հունիսի 1-ին տեղեկանալով, որ իր եղբայրը՝ Գորիսի քաղաքապետի նախկին թեկնածու Ավետիք Բուդաղյանը, Սյունիքի նախկին մարզպետ Սուրիկ Խաչատրյանի ավտոմեքենայում ծեծի է ենթարկվել, Սուրիկ Խաչատրյանին և նրա ընտանիքի անդամներին վախեցնելու նպատակով գնացել է Սուրիկ Խաչատրյանին պատկանող առանձնատան մոտ, իր անվամբ գրանցված որսորդական հրացանը ձեռքին իջնելով ավտոմեքենայից՝ սպանության սպառնալիքներ է տվել Սուրեն Խաչատրյանի ընտանիքի անդամներին: Ավետիք Բուդաղյանը սպանվել է, իսկ Արտակ Բուդաղյանը՝ հրազենային վնասվածքներով տեղափոխվել հիվանդանոց:
Արտակ Բուդաղյանին մեղադրանք է առաջադրվել Քրեական օրենսգրքի 137-րդ հոդվածի 1-ին մասով, որը նախատեսում է տուգանք՝ նվազագույն աշխատավարձի հիսնապատիկից հարյուրհիսնապատիկի չափով, կամ կալանք՝ առավելագույնը երկու ամիս ժամկետով, կամ ազատազրկում՝ առավելագույնը երկու տարի ժամկետով: Խափանման միջոց է ընտրվել ստորագրություն չհեռանալու մասին:
