Ֆրանսիայի Մանշի սենատոր, Եվրոպական հարցերով հանձնաժողովի եւ ԵԱՀԿ խորհրդարանական վեհաժողովում Ֆրանսիայի պատվիրակության փոխնախագահ Ժան Բիզեն կամենում է, որ միջազգային հանրությունը ճանաչի Լեռնային Ղարաբաղը` Հարավային Կովկասում կայունություն ապահովելու նպատակով: Այս մասին նա հայտարարել է սեպտեմբերի 7-12-ը Ստեփանակերտում ԼՂՀ ԼՂՀ նախագահի եւ ԱԳ նախարարի հետ հանդիպելուց հետո:
«Ժան Բիզեն՝
- իր անհամաձայնությունն է արտահայտում ԽՍՀՄ փլուզման ընթացքում 1991 թ-ի
սեպտեմբերի 2-ից անկախացած այս պետության նկատմամբ Ադրբեջանի կողմից տեղացող անդադար սպառնալիքների եւ պարտադրված շրջափակման կապակցությամբ: Ադրբեջանը վերջերս 20 անգամ ավելացրել է իր ռազմական բյուջեն եւ արգելում է Ստեփանակերտի օդանավակայանի ցանկացած օգտագործում` դրանով անընդունելի շրջափակում պարտադրելով 150 000 բնակչի, որոնք ձգտում են ապրել խաղաղ եւ անվտանգ,
- կամենում է, որ միջազգային հանրությունը ճանաչի Լեռնային Ղարաբաղը` Հարավային Կովկասում կայունություն ապահովելու նպատակով,
- ողջունում է Ֆրանսիայի, ԱՄՆ-ի եւ Ռուսաստանի կարեւոր դերակատարմամբ Մինսկի խմբի գործունեությունը, որն ուղղված է Եվրոպայի շեմին` Իրանի, Ռուսաստանի, Թուրքիայի եւ Հայաստանի հարեւանությամբ գտնվող այս փխրուն տարածաշրջանում պայթունավտանգ իրավիճակին վերջ դնելուն,
- գոհունակություն է հայտնում, որ Ֆրանսիայի նախագահը Մինսկի Խմբին հրավիրել է հանդիպել հոկտեմբերի 27-ին Փարիզում` այս թեման նորից շոշափելու նպատակով,
- կամենում է, որ հոկտեմբերի 27-ի այս ժողովի ընթացքում հաստատվեն կողմերի միջեւ փոխադարձ վստահության ամրապնդմանն ուղղված միջոցները եւ հստակեցվի Սարսանգի ջրամբարի ծրագիրը` Լեռնային Ղարաբաղի եւ Ադրբեջանի բնակչությանը ջրամատակարարման նպատակով»,-ասված է նրա տարածած հայտարարությունում: