Ռուսաստանի նավթային ոլորտում, այսպես կոչված, «հարկային մանեւրումը» կարող է մեծ խնդիր դառնալ Եվրասիական տնտեսական միության (ԵՏՄ) համար: Այս մասին սեպտեմբերի 29-ին Բելառուսի խորհրդարանի Ներկայացուցիչների պալատի Խորհրդի անդամների հետ հանդիպման ժամանակ հայտարարել է այդ երկրի նախագահ Ալեքսանդր Լուկաշենկոն:
Ըստ «ԲԵԼՏԱ»-ի, իրենց ելույթներում պատգամավորները մի շարք օրակարգային հարցեր են բարձրացրել, որոնց պետության ղեկավարը մանրամասն պատասխանել է: Հարցերից մեկը վերաբերել է Եվրասիական տնտեսական միության մասին պայմանագրի շուրջ խորհրդարանում աշխատանքին:
Անդրադառնալով Ռուսաստանի հարկային օրենսդրությունում փոփոխություններին, որոնք վերաբերում են նավթային ոլորտին, Լուկաշենկոն ընդգծել է, որ Ռուսաստանի «հարկային մանեւրումը» կհանգեցնի Բելառուսի համար զգալի ֆինանսական կորուստների: «Եթե Ռուսաստանը նման քայլ ձեռնարկի, դա մեծ խնդիր կդառնա Միության գործունեության համար: Նախ՝ քանի որ մենք այլ բանի մասին ենք պայմանավորվել: Երկրորդ, եթե մեկ ուղղությամբ որեւէ գործողություններ են ձեռնարկվում, նշանակում է՝ հարկավոր է, որպեսզի մեկ այլ ուղղությամբ փոխհատուցում լինի: Դրանք զգալի գումարներ են, որոնք մենք ոչ մի դեպքում չպետք է կորցնենք»,- ընդգծել է Լուկաշենկոն:
Նշենք, որ մասնագետների հաշվարկներով՝ Ռուսաստանի նավթային ոլորտում փոփոխությունների ընդունումը հանգեցնելու է բյուջե միջոցների մուտքի կրճատմանը:
