«Ժամանակ» թերթը գրում է. «Չնայած նախկինում ԲՀԿ առաջնորդ Գագիկ Ծառուկյանը հնարավոր բոլոր հարցազրույցներում պնդում էր, որ Հայաստանի նախագահ դառնալու որեւէ ցանկություն չունի, «ասինք՝ չէ, էլի, нет» կոնտեքստում, վերջին շրջանում կտրուկ փոխել է մտադրությունը:
«Ժամանակի» տեղեկություններով, նա իրեն հավատարիմ մարդկանց ասել է, որ պատրաստվում է առաջադրվել 2018 թվականի ընտրություններում որպես նախագահի թեկնածու:
Թեեւ Ծառուկյանի ցանկությունը միանշանակ չի ընդունվել ԲՀԿ-ականների շրջանում, այն թերեւս պատահական չէ: Կարելի է նկատել, որ նրա վրա խաղադրույք են կատարել քաղաքական որոշ ուժեր՝ օրինակ, ՀԱԿ առաջնորդ Լեւոն Տեր-Պետրոսյանը: Այս պահին «Ժառանգությունն» էլ է նույն թիմում: Կառաջադրվի՞ Րաֆֆի Հովհաննիսյանը որպես նախագահի թեկնածու 2018-ին, դեռ հայտնի չէ:
Չի բացառվում, որ 2018-ին Ծառուկյանը ընկալվի որպես ընդդիմության միասնական թեկնածու, եթե անգամ ՀՅԴ-ն չսատարի նրան: Չնայած ընդդիմադիր դիրքերից հանդես եկող ՕԵԿ նախագահ Արթուր Բաղդասարյանն արդեն հայտարարել է, որ առաջադրվելու է 2018-ին, ՕԵԿ-ն ընդդիմադիր դաշտում դեռ երկար ճանապարհ ունի անցնելու»։
Առավել մանրամասն՝ թերթի այսօրվա համարում
