2014 թվականի սեպտեմբերի 27-ին Երեւան քաղաքի Տերյան 19 հասցեում գործող գարեջրատուն-ռեստորանում տեղի ունեցած սպանության եւ մարմնական վնասվածք պատճառելու դեպքի առթիվ Երեւան քաղաքի քննչական վարչության Կենտրոնի քննչական բաժնում քննվող քրեական գործի շրջանակներում հետախուզում է հայտարարվել 1984 թ. ծնված Ավետ Օհանջանյանի նկատմամբ:
Ովքեր որեւէ տեղեկություն ունեն Օհանջանյանի գտնվելու վայրի մասին՝ ոստիկանությունը խնդրում է հայտնել վարույթն իրականացնող մարմնին կամ դիմել ոստիկանության մոտակա բաժին:
Տեղեկատու անձի գաղտնիությունը երաշխավորվում է:
Նշենք, որ սեպտեմբերի 27-ին «Նաիրի» բժշկական կենտրոնից ոստիկանության Կենտրոնականի բաժին ահազանգ է ստացվել, որ երկու քաղաքացի սուր կտրող-ծակող վնասվածքներով տեղափոխվել է իրենց մոտ:
Դեպքի վայր մեկնած օպերատիվ-քննչական խումբը պարզել է, որ ոմն Ավետ Օհանջանյանը իր մոտ եղած դանակով հարվածներ է հասցրել երեք անձանց՝ Սերգեյ Սենեքերիմյանին, Արման Փարսադանյանին եւ Արմեն Հարությունյանին: 58 թվականին ծնված Սերգեյ Սենեքերիմյանը վնասվածք է ստացել որովայնի շրջանում, իսկ 1975թ. ծնված Արման Փարսադանյանը վնասվածք էր ստացել կրծքավանդակի շրջանում: Նա, առավոտյան գիտակցության չգալով, մահացել էր: Դեպքի կապակցությամբ հարուցվել է քրեական գործ՝ Քր.օր.-ի 104 (սպանություն» եւ 112 (Դիտավորությամբ առողջությանը ծանր վնաս պատճառելը) հոդվածների հատկանիշներով, ընթանում է քննություն: