Արարատի քաղաքապետ Հայկ Հայկյանը չի մասնակցելու հոկտեմբերի 3-ին Արարատի Վազգեն Սարգսյանի հրապարակում կայանալիք հանրահավաքին: Այս մասին NEWS.am-ի թղթակցի հետ զրույցում ասաց քաղաքապետը: «Ի՞նչ մասնակցեմ, չէ, չեմ մասնակցելու, իմ առօրյա գործերով եմ զբաղվելու»,-ասաց Հայկ Հայկյանը:
Նա վստահեցրեց, որ իրենց քաղաքում հանրահավաքի ժամանակ որեւէ խոչընդոտ չի ստեղծվի: Ինչ վերաբերում է քաղաքապետարանի աշխատակիցների եռյակի հանրահավաքին մասնակցելուն, Հայկ Հայկյանն ասաց, որ աշխատակիցներին եւս թույլ չի տալու գնալ հանրահավաքի: «Աշխատողները աշխատանքի են, ի՞նչ հանրահավաքի մասին է խոսքը»,-ասաց Արարատի քաղաքապետը: Նա չգիտի, թե իր քաղաքում ընդդիմադիր հայացքներ ունեցողները շատ են, թե քիչ եւ արդյոք բազմամարդ հրապարակ է սպասվում եռյակին: