Հունաստանը պատրաստ է այսուհետ էլ աջակցել Հայաստանի եւ Եվրամիության կապերին: Այս մասին սեպտեմբերի 30-ին հայ-հունական գործարար համաժողովի բացմանն ասել է Հունաստանի նախագահ Կարոլոս Պապուլիասը: Նա նշել է, որ հայ եւ հույն ժողովուրդները ունեն ընդհանուր արժեքներ եւ պատմություն:
«Կապերը, որոնք մեզ միացնում են անցյալին, ողջ են: Դրանք ամրացնում եւ զարգացնում է Հունաստանի հայ համայնքը՝ շատ ակտիվ եւ ստեղծագործական ավանդ ներդնելով մեր երկրի տնտեսությունում: Մյուս կողմից, Հայաստանում հունական համայնքը թեեւ համեմատաբար փոքր է, սակայն քաջ հայտնի է իր ակտիվությամբ», - հավելել է Պապուլիասը:
Նա նշել է, որ Հունաստանում հայ ներդրողներին առաջարկելու բան կա: «Վերջին տարիներին երկիրը արագ քայլերով դուրս է գալիս տնտեսական ճգնաժամից. 2 տարվա ընթացքում այն Համաշխարհային բանկի «Doing Business» վարկանիշում բարձրացել է 28 կետով: «Մենք ուրախ կլինենք մեզ մոտ տեսնել նաեւ հայկական ընկերությունները», - նշել է Հունաստանի նախագահը: