ԵԱՀԿ մամուլի ազատության հարցերով ներկայացուցիչ Դունյա Միյատովիչը Հայաստանի իշխանություններին կոչ է արել պատասխանատվության ենթարկել այն անձնաց, որոնք մեղավոր են լրագրողների դեմ հարձակումների համար եւ վերջ տալ անպատժելիության մթնոլորտին՝ Երեւանում լրագրողների աշխատանքին միջամտելու դեպքից հետո:
Միյատովիչի հայտարարությունում հիշատակվում է «Հայկական ժամանակ» թերթի լրագրող Տագուհի Հովհաննիսյանի հետ կապված միջադեպը: Լրագրողը հարց տալու համար մոտեցել է Ղազախստանում հայկական սփյուռքի ներկայացուցչին, որից հետո պետծառայողը իր թիկնապահներին հրամայել է հեռացնել լրագրողին շենքից: Երբ Հովհաննիսյանը փորձել է հեռախոսով լուսանկարել, թիկնապահները խլել են հեռախոսը եւ ջնջել ձայնագրությունները:
Էդվարդ Նալբանդյանին ուղղված նամակում Միյատովիչը անհանգստություն է հայտնել վերջերս Հայաստանում լրագրողների վրա մի շարք հարձակումների առթիվ՝ հույս հայտնելով, որ նման միջադեպերը արժանի կերպով կքննվեն իրավապահ մարմինների կողմից:
Միյատովիչը հիասթափությամբ նշել է, որ քննչական ծառայությունը հրաժարվել է քրեական գործ հարուցել «Ա1+»-ի լրագրող Մարինե Խաչատրյանի դեմ հարձակման փաստի առթիվ, ինչպես նաեւ փակվել է «Չորորդ իշխանություն» թերթի լրագրող Անի Գեւորգյանի մասնակցությամբ միջադեպի առթիվ հարուցված գործը:
«Ես կոչ եմ անում իշխանություններին համարժեքորեն եւ ժամանակին զբաղվել այս հանցագործություններով: Անպատժելիությունը վտանգավոր է էլ ավելի մեծ բռնության համար եւ բացասաբար է ազդում խոսքի եւ մամուլի ազատության վրա»,-հայտարարել է ԵԱՀԿ ներկայացուցիչը:
