Անհայտ երիտասարդը կրակ է բացել ԱՄՆ Քարոլինա նահանգի Ալբերմարլ քաղաքի դպրոցներից մեկում, հաղորդում է NY Daily News-ը: Հրաձգության արդյունքում վիրավորվել է դպրոցականներից մեկը՝ Բերնարդ Միլլերը:
Նրա առողջական վիճակի մասին տեղեկատվություն դեռ չկա: Կրակողը ենթադրաբար Ջելեն Ռասելն է, որը ձերբակալվել է դեպքի վայրում:
Դպրոցը ժամանակավորապես փակվել է, իսկ աշակերտների ծնողներին խնդրել են հավաքվել մոտակա եկեղեցում:
Նշենք, որ նման միջադեպերն ուսումնական հաստատություններում լուրջ խնդիր են ԱՄՆ հասարակության համար: Երկրի պատմության մեջ ամենաարյունալի հրաձգությունը տեղի է ունեցել 2012-ի դեկտեմբերին Քոնեքթիքութ նահանգի Նյութաուն քաղաքի Սենդի Հուք դպրոցում: Այն ժամանակ 20-ամյա Ադամ Լանզան գնդակահարել էր 20 աշակերտների եւ 6 մեծահասակների:
