Ղազախստանի խորհրդարանի ստորին պալատը հավանություն է տվել «Եվրասիական տնտեսական միության մասին պայմանագրի վավերացման» օրինագծին, հաղորդում է «Կազինֆորմ» գործակալությունը:
Հանրապետության ազգային էկոնոմիկայի նախարար Էրբոլաթ Դոսաեւը, ներկայացնելով օրինագիծը, հիշեցրեց, որ Եվրասիական միության մասին պայմանագիրը ստորագրվել է 2014թ. մայիսի 29-ին, Աստանայում` Ղազախստանի, Ռուսաստանի եւ Բելառուսի նախագահների կողմից: «Այս փաստաթուղթը կարեւորագույն նշանակություն ունի Ղազախստանի համար, քանի որ տարիներ շարունակ կսահմանի պետության արտաքին տնտեսական քաղաքականության հիմքերը: Համաշխատրհային տնտեսական աճի տեմպերի նվազման բարդ պայմաններում Ղազախստանը Եվրասիական տնտեսական միությունում տնտեսության դիվերսիֆիկացման, աշխատանքի արտադրողականության բարձրացման, աշխարհի առավել մրցունակ 30 երկրների մեջ ընդգրկվելու համար կստեղծի անհրաժեշտ հիմք», - հավելել է նախարարը:
Նա նշել է, որ եվրասիական ինտեգրման տնտեսական ներուժը շատ բարձր է: Մասնակից երկրների տնտեսությունների ամբողջական ծավալը ավելի քան 2 տրլն դոլար է կազմում, երեք երկրների արդյունաբերական արտադրանքի թողարկման ընդհանուր ծավալը` մոտ 1,5 տրլն դոլար: 2030թ. Ընդհանուր ՀՆԱ-ի հավելաճի տեսքով հեռանկարային ինտեգրացիոն արդյունքը կարող է կազմել 900 մլրդ դոլար:
Դոսաեւը նաեւ նշել է, որ պայմանագրի հիմքում ընկած են Եվրասիական տնտեսական միության անդամ-երկրների ինքնիշխան հավասարության, տարածքային ամբողջականության սկզբունքները:
