Երեւանի Այգեստան 167 տան մոտ, դեպի Սարալանջ տանող նոր ճանապարհին սեպտեմբերի 30-ին հնչած կրակոցների առթիվ հարուցվել է քրեական գործ ՔՕ-ի 34-104 հոդվածի (սպանության փորձ) եւ 235 հոդվածի 1-ին մասի (ապօրինի զենք-զինամթերք կրելը, պահելը, օգտագործելը) հատկանիշներով:
Մեր աղբյուրների փոխանցմամբ՝ կրակոցները հնչել են «Պրադո» մեքենայի միջից «Ռենջ Ռովեր» մեքենայի ուղղությամբ: Ոստիկանությունը որոնում է «Պրադո» ավտոմեքենան եւ նրա վարորդին:
Երկու մեքենաներում էլ գտնվել են մեկական անձինք: Միջադեպի հետեւանքով տուժած երիտասարդը՝ 21-ամյա Լեւոն Հարությունյանը ԵՊՀ ուսանող է: Կրակոցների պատճառ դեռ հայտնի չէ, չի բացառվում, որ աղջկա պատճառով են հնչել կրակոցները:
Ավելի վաղ NEWS.am-ը հայտնել էր, որ Սարալանջում մի մեքենայից կրակոցներ են հնչել մյուսի ուղղությամբ, որի մեջ գտնվողը ոտքին ստացել է վնասվածք: Երթեւեկության ընթացքում «Ռենջ Ռովեր» մակնիշի մեքենայի ուղղությամբ կրակոցներ են արձակել ու դիմել փախուստի: Թե ինչ պատճառով է վեճը ծագել, դեռ հայտնի չէ: Դեպքի վայրից հայտնաբերվել են պարկուճներ:
