Քաղաքական այս կամ այն հարցերի շուրջ տարբեր հայացքների առկայությունը չի խանգարի երկրի տարբեր մարզերում հանրահավաքներ անցկացնող խորհրդարանական եռյակի համագործակցությանը: Այս մասին NEWS.am-ի թղթակցի հետ զրույցում հայտարարեց Ազգային ժողովի Հայ ազգային կոնգրես խմբակցության քարտուղար Արամ Մանուկյանը՝ պատասխանելով հարցին, թե ինչպես է ՀԱԿ-ը վերաբերվում այն հանգամանքին, որ մարզային հանրահավաքների ժամանակ «Բարգավաճ Հայաստան»-ի ներկայացուցիչները խուսափում են իշխանափոխության կոչերից:
«Դուք հարցնում եք քաղաքական այն ուժի մասին, որին ես չեմ անդամակցում: Հարցրեք նրանք: Դուք ցանկանում եք, որ ես կարծիք հայտնեմ իմ իմ գործընկերների մասի՞ն»,- ասաց ՀԱԿ ներկայացուցիչը:
Իսկ հարցին, արդյո՞ք դա չի խանգարի հետագա համագործակցությանը, Արամ Մանուկյանը պատասխանեց. «Մենք երկու տարի միասին աշխատում ենք: Դա մեզ խանգարե՞լ է: Մենք գործնական համագործություն ունենք»:
Մեկնաբանելով հնարավորությունը, թե ելնելով քաղաքական նկատառումներից, ինչպես այդ պատահեց խորհրդարանական քառյակի դեպքում, որը սահմանադրական բարեփոխումների պատճառով «եռյակ» դարձավ, հնարավո՞ր է իշխանափոխության պահանջների պատճառով արդեն «երկյակ» դառնա, Մանուկյանը հայտարարեց. «Եթե չկռռաք, նման բան չի լինի»: