«168 ժամ» թերթը գրում է. «Ոչ իշխանական ուժերի քառյակն այս տարվա հունիսին հրապարակելով այդ 12 պահանջները՝ դրանք կատարելու համար վերջնաժամկետ էր սահմանել սեպտեմբերի 30-ը՝ այդպես էլ չնշելով, թե ինչ է պատրաստվում անել, եթե կառավարությունը չկատարի դրանք: Եվ ահա երեկ կառավարությունը երկարաշունչ հրապարակմամբ պատասխանել է՝ ոչ մի պահանջ էլ չի կատարելու, եթե դրանք չեն բխում կառավարության ծրագրից:

Կառավարության պատասխանն ընդամենը այն բանի ֆորմալ արձանագրումն է, ինչն առանց այն էլ պարզ էր նույն հունիս ամսին:
Տրամաբանությունը հուշում է, որ քառյակն ի սկզբանե պետք է հայտարարեր, որ իր ներկայացրած պահանջների չկատարման դեպքում պահանջելու է նախագահ Սերժ Սարգսյանի կամ առնվազն կառավարության ու վարչապետ Հովիկ Աբրահամյանի հրաժարականը:

Բայց քառյակը/եռյակը մինչեւ այսօր նման պահանջներ չի բարձրացնում, եւ քիչ հավանական է, որ կբարձրացնի հոկտեմբերի 10-ի հանրահավաքում: Այսպիսով՝ Հովիկ Աբրահամյանը կառավարության պատասխանով քառյակին դնում է երկընտրանքի առաջ՝ կամ հրաժարականի պահանջներ ներկայացնել, կամ դադարեցնել քառյակի ձեւաչափն ընդհանրապես:

 Հիմա կամ քառյակը պետք է պայքարի իր հաղթանակի, այսինքն՝ այս կառավարության դեմ, կամ պահանջի Հովիկ Աբրահամյանին վարչապետ նշանակած Սերժ Սարգսյանի հրաժարականը: Քառյակի ուժերից առնվազն երկուսը՝ ՀԱԿ-ն ու «Ժառանգությունը», նման խնդիր չունեն: Սակայն նրանց խնդիրն այն է, որ առանց ԲՀԿ-ի, որը նաեւ իրենց թեթեւ ձեռքով դարձել է ոչ իշխանականների դոմինանտ ուժը, նրանք այլեւս ի վիճակի չեն հրաժարականների պահանջ ներկայացնել:

Իսկ ԲՀԿ-ն առայժմ սահմանափակվում է միայն համակարգային փոփոխությունների պահանջով: Այնպես որ, բացառված չէ, որ համակարգային փոփոխությունների շրջանակում ԲՀԿ-ն ՀԱԿ-ից ու «Ժառանգությունից» պահանջի հրաժարվել հրաժարականի պահանջից կամ դուրս գալ քառյակ/եռյակ ձեւաչափից: Ի վերջո, դա եւս կլինի համակարգային փոփոխություն, քանի որ ներկայումս հենց այդ ձեւաչափն է կազմում քաղաքական համակարգ կոչվածի առանցքներից մեկը»։

Առավել մանրամասն՝ թերթի այսօրվա համարում