Ազգային ժողովի նախագահ Գալուստ Սահակյանն պաշտոնական այցով մեկնելու է Վրաստան: Այս տեղեկությունը NEWS.am-ի թղթակցի հետ զրույցում հաստատեց Հասարակայնության եւ տեղեկատվության միջոցների հետ կապերի վարչության պետ Արսեն Բաբայանը:
Նա նշեց, որ այցը երկօրյա է՝ հոկտեմբերի 6-8: Պատվիրակության կազմն այս պահին նա չկարողացավ հայտնել, քանի որ դեռեւս հրաման չկա: Ինչ վերաբերում է ԱԺ նախգահի քիչ այցելություններին, Արսեն Բաբայանն ասաց, որ այցելությունները ԱԺ նախագահի այնքան են, որքան անհրաժեշտ են:
Նշենք, որ «Չորրորդ իշխանություն» թերթը գրել է, որ լավատեղյակ աղբյուրներից հայտնի դարձավ, որ ԱԺ նախագահ Գալուստ Սահակյանն առաջիկայում պաշտոնական այցով մեկնելու է Վրաստան, նրա այցը նախատեսված է հոկտեմբերի 6-ին: «ՉԻ» տեղեկություններով` պատվիրակության կազմում ընդգրկված են լինելու հիմնականում ծնունդով ջավախքցի պատգամավորները, որոնք կապեր ունեն այնտեղ: Նկատենք, որ Գալուստ Սահակյանը` որպես ԱԺ նախագահ, աշխատանքային այցերի շատ քիչ է մեկնում. իր պաշտոնավարման վեց ամսվա ընթացքում նա եղել է միայն ՌԴ-ում եւ ԼՂՀ-ում: Հետաքրքիր է` Գրիգորիչին արտաքին խորհրդարանական կապերը չե՞ն հետաքրքրում, թե՞ դրսում նրա հանդեպ չունեն հետաքրքրություն»։