Ադրբեջանի արտգործնախարար Էլմար Մամեդյարովը ձեւացրել է, թե լավ չի լսում եւ խուսանավել ԵԽԽՎ պատվիրակների որոշ հարցերից: Այսպես, հարցին, թե Հեյդար Ալիեւի հիմնադրամում ինչու չեն հարկային ստուգումներ անցկացվում, նախարարը պարզապես չի պատասխանել:
ԵԽԽՎ լեհաստանցի պատվիրակ Ռոբերտ Բիեդրոնը հետաքրքրվել է, թե ինչու Հեյդար Ալիեւի հիմնադրամում ստուգումներ չեն անցկացվում. «Սեփականության մասին ոչ մի զեկույց հիմնադրամը չի ներկայացրել», - հայտարարել է Բիդերոնը:
Ի պատասխան Էլմար Մամեդյարովը հայտնի երգն է երգել իր երկրում տիրող «թափանցիկության եւ հանդուրժողականության բավական բարձր մակարդակի» մասին: Միաժամանակ նա հայտարարել է, որ պատվիրակները պետք է ընդդիմադիր թերթեր կարդան:
Պատասխանելով մյուս պատվիրակների հարցերին` Ադրբեջանի արտգործնախարարը հայտարարել է, որ «Ադրբեջանում համացանցը շատ ազատ է»:
