Շատ օտարերկրյա ներդրողներ, չնայած Ռուսաստանի նկատմամբ պատժամիջոցներին, շարունակում են ներդրումներ կատարել ռուսական տնտեսությունում, հաղորդում է «Ինտերֆաքսը»՝ վկայակոչելով Վլադիմիր Պուտինին:
Ելույթ ունենալով «ՎՏԲ Կապիտալ» ինվեստիցիոն համաժողովում՝ Ռուսաստանի նախագահը, մասնավորապես ընդգծել է, որ ներդրողների կողմից Ռուսաստանի նկատմամբ վստահությունը պահպանվում է:
Հոկտեմբերի 2-ին կայացած «Ռուսաստանը կանչում է» համաժողովին իտալական Pirelli ընկերության ղեկավարությունը հայտնել էր Ռուսաստանում ներդրումներն ավելացնելու իր մտադրությունների մասին:
Աղբյուրը նշում է, որ Pirelli ընկերությունը զբաղվում է անվադողերի արտադրության ամբողջական շղթայով. նախագծումից մինչեւ արտադրություն եւ վաճառք: Pirelli-ի արտադրական կառույցի մեջ են մտնում աշխարհի 13 երկրների 22 գործարաններ (Արգենտինա, Բրազիլիա, Չինաստան, Եգիպտոս, Գերմանիա, Մեծ Բրիտանիա, Իտալիա, Մեքսիկա, Ռումինիա, Ռուսաստան, Թուրքիա, ԱՄՆ եւ Վենեսուելա):
