Ամենայն հայոց կաթողիկոս Գագեգին Բ-ն եւ Ն.Ս. Մոր Իգնատիուս Եփրեմ Բ Անտիոքի եւ Համայն Արեւելքի պատրիարքը Մայր աթոռ Սբ Էջմիածնի միաբանների եւ Ասորի Եկեղեցու պատվիրակության ուղեկցությամբ, այսօր՝ հոկտեմբերի 11-ին, այցելել են Ծիծեռնակաբերդի հուշահամալիր` հարգանքի տուրք մատուցելու Հայոց ցեղասպանության զոհերի հիշատակին:
Մայր աթոռ Սբ Էջմիածնի տեղեկատվական համակարգից հայտնում են, որ ծաղկեպսակների զետեղումից հետո հուշահամալիրում` անմար կրակի մոտ, նախագահությամբ Հայաստանյայց Առաքելական եւ Ասորի Ուղղափառ եկեղեցիների հովվապետերի, կատարվել է հոգեհանգստյան արարողություն բյուրավոր հայ եւ ասորի նահատակների լույս հոգիների հանգստության համար:
Հայոց ցեղասպանության ինստիտուտ-թանգարանի տնօրեն Հայկ Դեմոյանի ուղեկցությամբ Ամենայն Հայոց կաթողիկոսը եւ Անտիոքի եւ Համայն Արեւելքի պատրիարքը ծանոթացան նաեւ Հայոց ցեղասպանության ինստիտուտ-թանգարանի սրահներում կազմակերպված ժամանակավոր ցուցադրությանը: