Մաքսային միության անդամ երկրներում բարձր գնաճ է նկատվում, որը փոքր չափերով գերազանցում է, ասենք, Եվրամիության երկրների ցուցանիշները: Ըստ ռուսաստանցի փորձագետների՝ դրա հիմնական պատճառները Ռուսաստանում կապված են մեքենաների վառելիքի, ալկոհոլի եւ ծխախոտի ակցիզների բարձրացման, ռուբլու «թուլացման», Ուկրաինայի հակամարտության հետեւանքների եւ էմբարգոյի ենթարկված սննդամթերքի գների բարձրացման հետ: Սակագների բարձրացման հերթում բնակարանային-կոմունալ ծառայություններն են: Ներկայում 7%-ի շեմն արդեն անցել է, տարեվերջին սպասվում է մինչեւ 8% աճ:
Բելառուսում կյանքի թանկացումը գրեթե նույն պատճառներն ունի, ինչ Ռուսաստանում՝ բացառությամբ վերոնշյալ էմբարգոյի եւ հակամարտության: Բելառուսական փորձագետների կարծիքով, ընթացիկ տարում հիմնական ռիսկերը կարող են կապված լինել ազգային արժույթի հետագա թուլացման, ինչպես նաեւ նոր ակցիզների ներդրման հետ: Իր դերը կունենա նաեւ բնակարանային-կոմունալ ծառայությունների սակագների հնարավոր բարձրացումը: Արդյունքում գնաճի կանխատեսվող տեմպերը գերազանցելու են 17%-ի շեմը:
Ղազախստանում գնաճը հունվար-սեպտեմբերին կազմել է 7,4 տոկոս՝ տարեկան կտրվածքով: Միաժամանակ, նվազագույն կենսամակարդակի մեծությունը սեպտեմբերին ավելացել է 8,1 տոկոսով: Հետաքրքրական է, որ ղազախ արտահանողները գնաճը կապում են Ռուսաստանի հետ: Նրանք ենթադրում են, որ մի շարք ապրանքների ներքին գների հավասարեցում է տեղի ունենում, որոնք Ղազախստանում էժան էին, քան Ռուսաստանում:
Բացի այդ, երրորդ երկրներից ներկրվող ապրանքների թանկացումը հետեւանք է Մաքսային միության նոր, բարձր մաքսատուրքերի ներդրման: Ի դեպ, 2015-ի հունվարի 1-ից Ղազախստանում կբարձրանան ֆիլտրով ծխախոտի նվազագույն մանրածախ գները մինչեւ 200 թենգե (մոտ 454 դրամ) մեկ տուփի համար: Սա, ի ուրախություն մեր արտահանողների:
Մաքսային միությունը միավորում է տարբեր մասշտաբներ ու տրամաչափեր ունեցող երկրների, ուստի այդ միավորման դերը նույնը չէ այդ երկրների արտաքին առեւտրի համար: Հունվար-օգոստոսին Ռուսաստանի արտաքին ապրանքաշրջանառության մոտ կեսը (49,2 տոկոս) բաժին է ընկել Եվրամիությանը: Իսկ ահա ՄՄ-ի գործընկերների բաժինը եղել է 6,6 տոկոս: Միաժամանակ, Բելառուսի գլխավոր առեւտրային գործընկերը Ռուսաստանն է. Բելառուսի արտաքին առեւտրի 40 տոկոսը եւ ներմուծման ծավալի մոտ կեսը բաժին է ընկնում հենց Ռուսաստանին: