Սանկտ–Պետերբուրգում, հոկտեմբերի 16-ին, տեղի ունեցավ «Աշխարհի հայ մամուլը» ցուցահանդեսի բացման պաշտոնական արարողությունը։
Միջոցառման սկզբում «Պետերբուրգի հայեր» տարածաշրջանային հասարակական կազմակերպության նախագահ Ալեքսանդր Նազարովը կարդաց Հայաստանի Հանրապետության Սփյուռքի նախարար Հրանուշ Հակոբյանի ողջույնի նամակը։ Սանկտ–Պետերբուրգի Ազգությունների տան տնօրենը շնորհավորեց ներկաներին մամուլի տոնի առթիվ։ «Հյուպատոս» ամսագրի գլխավոր խմբագիր Օլեգ Դավթյանը երախտագիտության խոսքեր հայտնեց միջոցառման կազմակերպիչներին, որոնք ներկայացրել են հարյուր անուն հրատարակություն՝ հավաքված տասնչորս երկրներից, նա բարձր գնահատեց հայ պարբերական մամուլի հավաքածուն։ Ռուսաստանի գիտությունների ակադեմիայի գրադարանի ներկայացուցիչ Տատյանա Բոգոսլովսկայան հաղորդեց գիտությունների ակադեմիայի գրադարանի տնօրեն Վալերի Լեոնովի ողջույնի խոսքերը։
Իր տպավորությունները կիսեց պետերբուրգյան լրագրող եւ հասարակական գործիչ Անտուան Առաքելյանը։ Էթնոլոգիայի բնագավառի գիտաշխատող Սիլվա Լազարյանը տվեց իր գնահատականը ցուցահանդեսի մասին։ Նրա կարծիքով ցուցահանդեսը կարող է նպաստել հայ ժողովրդի ազգային արժեքների նույնականության պահպանմանը։ Այնուհետեւ Ալեքսանդր Նազարովն էքսկուրսիա անցկացրեց եւ համառոտ պատմեց յուրաքանչյուր թերթի ու ամսագրի մասին։
Միջոցառման ավարտին հաղորդավարն ունկնդիրների ուշադրությանը ներկայացրեց զեկույց՝ հայ մամուլի պատմության մասին։
Միջոցառումը՝ նվիրված «Ազդարար»–ի առաջին համարի 220-ամյակին, կազմակերպել էր «Պետերբուրգի հայեր» տարածաշրջանային հասարակական կազմակերպությունը՝ Սանկտ–Պետերբուրգի Ազգամիջյան հարաբերությունների եւ գաղթային քաղաքականության իրականացման կոմիտեի աջակցությամբ։