Երբ Հայաստանը մուտք գործի Եվրասիական տնտեսական միություն, հայ ֆերմերների՝ ապրանքի վաճառքի հետ կապված հոգսերը կնվազեն: Այս մասին NEWS.am-ի թղթակցի հետ զրույցում հայտարարեց Հայաստանի Գյուղատնտեսության նախարարության արտաքին կապերի վարչության պետ Անդրանիկ Պետրոսյանը:
Նա ընդգծեց, որ Մոսկվայի քաղաքապետարանը մեծ աջակցություն է ցուցաբերել հայկական կողմին. սեպտեմբերին հայկական գյուղմթերքների վաճառքի համար անվճար հատկացվել է 1000 քառ. մետր տարածք՝ Ցուցահանդեսների համառուսական կենտրոնի հարեւանությամբ, որտեղ հոկտեմբերի 8-ից 11-ն անցկացվել է ագրոարդյունաբերական «Ոսկե աշուն 2014» ցուցահանդեսը: «Տարածքից բացի՝ Մոսկվայի իշխանություններն անվճար տաղավարներ են հատկացրել: Այսինքն, մեր արտադրողներն ու արտահանողները ստացել են բոլոր պայմանները՝ իրենց ապրանքը ռուս գնորդներին ներկայացնելու համար»,- հայտնեց Պետրոսյանը: Մոսկվայի քաղաքապետարանը համաձայնել է երկարաձգել բաց տոնավաճառը մինչեւ հոկտեմբերի վերջը, որքան թույլ տան եղանակային պայմանները:
Ռուս սպառողներն ավելի են գնահատում հայկական արտադրանքը: Պատահական չէ, որ հայկական տաղավարներում է եղել ՌԴ վարչապետ Դմիտրի Մեդվեդեւը եւ հայտարարել, որ Ռուսաստանի շուկայում ցանկալի կլիներ ավելի շատ հայկական ապրանքներ տեսնել: «Սա նշանակում է միայն մեկ բան. մեր վերամշակող ընկերություններն ու ֆերմերները իրացման կայուն շուկա կունենան: Մնում է մտածել միայն որակյալ ապրանք արտադրելու մասին»,- հայտարարեց նա: