Հայկական «ՉինՎան» ընկերությունը մտադիր է Ռուսաստանի հարավ գյուղգործիքներ արտահանելու բանակցություններ սկսել: Այս մասին NEWS.am-ի թղթակցին հայտնեց «ՉինՎան» ՍՊԸ-ի տնօրեն Սամվել Նաջարյանը:
Վանաձորում գտնվող ընկերությունը զբաղվում է «Բելառուս» տրակտորների վերանորոգմամբ, չինական մասերով դրանց հավաքմամբ եւ գյուղատնտեսական գործիքների արտադրությամբ:
«Մենք ցանկանում ենք գրավել Կրասնոդարի, Ռոստովի մեր ռուսական գործընկերների ուշադրությունը: Մեր հաշվարկներով՝ մենք կարող ենք ավելի էժան թողարկել, քան այսօր կա այնտեղի շուկաներում»,- հայտարարել է Նաջարյանը:
Ըստ նրա՝ Չինաստանից լրակազմի ներկրումը չպետք է դժվարանա ԵՏՄ-ին Հայաստանի անդամակցության հետեւանքով: «Ծայրագույն դեպքում այնտեղից ուղիղ Ռուսաստան կներկրենք եւ տեղում կհավաքենք այնտեղի շուկայի համար», - նշել է նա:
«Հույս ունենք զարգացնել կապերը նաեւ Բելառուսի տրակտոր արտադրողների հետ, որոնց հետ վաղուց ենք համագործակցում», - հավելել է Նաջարյանը: