Գեղարքունիքի մարզի Ներքին Գետաշենում համայնքի ղեկավարի ընտրություններին մասնակցողների թիվը քիչ է եղել http://news.am/arm/news/234933.html եղանակային վատ պայմանների եւ տոնավաճառի պատճառով: Այս մասին NEWS.am-ին ասաց արդեն 4-րդ անգամ վերընտրված Կարո Գեւորգյանը:
«Մեզ մոտ ընտրությունները միշտ էլ ամենաբարձր մակարդակով են անցել, Ներքին Գետաշենի ժողովրդին որեւէ կերպ չես կարող շեղել, նրանք միշտ էլ ճիշտ ընտրություն են կատարում: Այս անգամ էլ հետաքրքրությունն ինչպես միշտ մեծ էր, սակայն շատերն ընտրության չէին եկել, որովհետեւ նախ տոնավաճառի օրն էր, շատերը շուկա էին գնացել: Բացի դրանից էլ ժամը 11:00-ից սկսեց անձրեւել, ցուրտ էր, դրանով էլ էր պայմանավորված քիչ մասնակցելը»,- ասաց Կարո Գեւորգյանը:
Նրա խոսքով՝ ինքը որեւէ խնդիր չունի մյուս թեկնածուի հետ: Թե ինչպես է վերջինս ընդունել պարտությունը, Կարո Գեւորգյանը չգիտեր:
Նշենք, որ Գեղարքունիքի մարզի Ներքին Գետաշենում ընտրություններին մասնակցել է ընդամենը 2724-ը 6121 ընտրողներից (44 տոկոս): Այս համայնքում հաղթել է գործող ՀՀԿ-ական գյուղապետ Կարո Գեւորգյանը՝ 1996 ձայնով: