Հայաստանի Եվրասիական տնտեսական միությանն անդամակցելուց հետո էապես բարդանում է Արցախի հարցը, ԼՂ հակամարտության կարգավորման բանակցային գործընթացը Կրեմլը փորձում է ամբողջապես իր ձեռքը վերցնել: Այս մասին NEWS.am-ի թղթակցի հետ զրույցում ասաց նախկին ՀՀ նախագահի հատուկ հանձնարարություններով դեսպան, ՀՀ ԱԱԾ նախկին ղեկավար Դավիթ Շահնազարյանը, ով պատասխանել է մեր մի քանի հարցերին:
Պարոն Շահնազարյան, ինչպե՞ս եք գնահատում Շանթ Հարությունյանի եւ նրա ընկերների դեմ կայացված դատավճիռը:
Շանթ Հարությունյանի եւ նրա ընկերների դեմ դատավճիռը բացառապես քաղաքական է, եւ ես կարծում եմ, որ այդ իրավիճակում, երբ Հայաստանը բռնակցվում է Ռուսաստանի կողմից, դատավճռում առկա է նաեւ այդ գործոնը: Եւ եթե այս գործընթացը իր շարունակությունն ունենա, ապա կարծում եմ՝ մարդու իրավունքների, քաղաքացիական հասարակության նկատմամբ եղած այն վերաբերմունքը, ճնշումները, խախտումները, որ կան Ռուսաստանում, տարածվելու է նաեւ այստեղ: Շանթի պայքարը հանուն Հայաստանի պետականության եւ ինքնիշխանության էր, եւ Ռուսաստանը շատ անհանգստացած է նման դրսեւորումներով, որովհետեւ մեր հասարակության մեջ քաղաքականապես ակտիվ հատվածի մոտ ավելի ու ավելի է ամրապնդվում համոզմունքը, որ մենք հերթական անգամ կորցնում ենք մեր պետականությունն ու ինքնիշխանությունը, եւ Ռուսաստանը հերթական անգամ բռնակցում է մեզ իրեն: Ակնհայտ է, որ Եվրասիական միության մյուս երեք պետություններում մարդու իրավունքների, քաղաքացիական ազատությունների մասով վիճակն անհամեմատ ավելի վատթար է, քան Հայաստանում:
Հոկտեմբերի 10-ին ստորագրվեց Հայաստանի ԵՏՄ անդամակցության պայմանագիրը, ի՞նչ է սպասվում մեզ դրանից հետո:
Այս անդամակցումը դեմ է մեր սահմանադրությանը, եւ խորհրդարան մտնելուց առաջ այն պետք է մտնի Սահմանադրական դատարան: Ակնհայտ է, որ դա հակասահմանադրական է: ԵՏՄ անդամակցությունից հետո էապես բարդանում է Արցախի հարցը, ԼՂ հակամարտության կարգավորման բանակցային գործընթացը Կրեմլը փորձում է ամբողջապես իր ձեռքը վերցնել: Եթե ժամանակի ընթացքում Հայաստանի եւ Արցախի միջեւ նախատեսված մաքսակետը տեղադրելու գործընթացն արագանա, դա իհարկե ոչ թե Հայաստանի ենթակայության տակ կլինի, այլ Եվրասիական միությունում գործող այդ վերպետական մարմնի ենթակայության ներքո: Ռուսաստանի եւ Ադրբեջանի միջեւ օրեցօր ավելի ծավալվող ռազմական համագործակցությունը շատ վտանգավոր իրավիճակ է ստեղծում ԼՂՀ-ի եւ Հայաստանի համար: Հայաստանը պետք է ամեն ինչ անի, որպեսզի պահպանի ԵԱՀԿ Մինսկի խումբը՝ որպես միջազգային ձեւաչափ, եւ դրանով եռանախագահների կողմից առաջարկվող սկզբունքների հիման վրա, որը Հայաստանը պաշտոնապես ընդունել է, իսկ Ադրբեջանը ամեն կերպ փորձում է խուսանավել, փորձի այդ ուղղությամբ զգալի առաջընթաց ապահովել Մինսկի խմբում:
Հոկտեմբերի 24-ին եռյակի հաջորդ հանրահավաքն է, ինչպե՞ս եք գնահատում այն:
Ես արդեն մամուլում անդրադարձել եմ այդ հարցին, չեմ ուզում կրկնել, ասեմ միայն, որ եռյակ, քառյակ միավորումը իր քաղաքական բովանդակությամբ ամբողջովին մարգինալ է եւ փաստացի իշխանությունների հետ միասին եվրասիական մակույկում է գտնվում:
Զրուցեց՝ Ինգա Մարտինյանը