Ի տարբերություն հրեական Հոլոքոստի՝ հայ ժողովուրդը ցեղասպանության է ենթարկվել իր հայրենիքում: Այդ մասին այսօր՝ հոկտեմբերի 20-ին, ելույթ ունենալով «Արեւմտահայերի ազգային համագումար» միջազգային հասարակական կազմակերպության համաժողովին, հայտարարեց Ազգային ժողովի փոխխոսնակ Էդուարդ Շարմազանովը:
Նրա խոսքով՝ հեքիաթները, որոնք թուրքական ղեկավարությունը փորձում է ներկայացնել միջազգային հանրությանը՝ ի դեմս նախագահ Ռեջեփ Թայիփ Էրդողանի, ոչ մի առնչություն չունեն իրականության հետ: «Չի կարելի է մարդասպանին եւ զոհին դիտարկել միեւնույն հարթության մեջ: Մենք բոլորս գիտենք, որ քրիստոնեական ժողովուրդների, եւ մասնավորապես, Օսմանյան կայսրության տարածքում ապրող հայ ժողովրդի ոչնչացումը ծրագրվել է նախքան Առաջին աշխարհամարտը՝ նախքան 1914թ.-ը», - ընդգծեց Շարմազանովը: Նա հավելեց, որ բազմաթիվ պատմական փաստաթղթերից հստակ երեւում է, որ Օսմանյան պետությունը՝ սկզբում սուլթանները, իսկ հետո՝ երիտթուրքերը, ծրագրել են պանթուրքիզմի քաղաքականության իրագործումը: Եւ այսօր պանթուրքիզմը ոչ միայն Հայաստանի, այլեւ ողջ տարածաշրջանի համար սպառնալիք է:
«Ես ողջունում եմ այս ֆորումը, սակայն կարծում եմ, որ մենք արդեն ունենք անկախ պետություն եւ բոլոր ջանքերը պետք է կենտրոնացնել մեր երկրում: Այսօրվա Թուրքիան ապացուցում է, որ շարունակում է իրականացնել ժխտողական քաղաքականությունը, ուստի մենք պետք է միասնակամ աշխատենք եւ աշխարհին ցույց տանք, որ Սփյուռք-Հայաստան-Արցախ եռամիասնությամբ մենք կարող ենք հասնել տրամաբանական ավարտի՝ այսինքն արդար դատի», -եզրափակեց ԱԺ փոխնախագահը: