Հայոց ցեղասպանության հարցը իրավական խնդիր է. կան բազմաթիվ միջազգային ատյաններ, որոնցում անհրաժեշտ է բարձրացնել մեր իրավական պահանջները, հոկտեմբերի 20-ին «Արեւմտահայոց ազգային համագումար» միջազգային հասարակական կազմակերպության համաժողովում հայտարարել է ՀՀ ԱԺ անկախ պատգամավոր Էդմոն Մարուքյանը:
Ըստ նրա` այն տպավորությունն է, թե վերջին 100 տարում մենք` որպես ազգ, միշտ միակողմանի շեշտադրում ենք արել: «Մենք միշտ խոսել ենք մեր իրավունքները ոտնահարելու մասին, սակայն չենք ձեռնարկել միասնական քայլեր մեր պահանջների կատարման ուղղությամբ: Մենք պետություն ունենք ` Հայաստանի Հանրապետություն, եւ ամբողջ աշխարհի հայերին առաջին պատգամն այն է, որ Հայաստանը համայն հայոց պետությունն է եւ մեր բոլոր ցանկությունների իրականացման ասպարեզը: Առաջին հերթին մենք պետք է մտածենք այս պետության ուժեղացման, իսկ հետո` այն մեր իրավունքները վերականգնելու համար օգտագործելու մասին»:
